১৪০ বিধ প্ৰজাতিৰ বিলাহীৰে এক দৃষ্টি নন্দন পৰিৱেশ বিশ্বনাথৰ পাভৈত। ৰং বিৰঙৰ বিলাহীবোৰৰ কোনোবাটোৰ ওজন যদি ২৫০ গ্ৰাম তেন্তে কোনোবাটোৰ আকৌ মাত্ৰ ৫ গ্ৰাম। ৰঙা ক্ৰিকেট বলটোৰ পৰা মাৰ্বল গুটি বা কাঁচি বগৰীৰ দৰে এই নানা ৰঙৰ বিলাহী বোৰে এতিয়া সকলোৰে দৃষ্টি কাঢ়িছে। এই বিলাহী বোৰ লমা লমকৈ লাগি আছে বিশ্বনাথৰ বিশিষ্ট যুৱ কৃষক নীলম দত্তৰ কৃষি পাম পাভৈ গ্ৰীণত।
নীলম দত্তই এই বিলাহীৰ খেতি কৰিছে পাভৈ গ্ৰীণত। উদ্দেশ্য বিলাহীৰ বিভিন্ন প্ৰজাতিৰ বীজ উৎপাদন। উল্লেখযোগ্য যে নীলমে এই বিলাহীৰ উপৰি ধানক ধৰি বিভিন্ন প্ৰজাতিৰ বীজ সংৰক্ষণ কৰিছে। ইয়াৰ উপৰি ফুল, বন্ধা, বকলি, ওলকবিৰ মুঠ ৫২ টা প্ৰজাতিৰ কবি আৰু ৮০ টা প্ৰজাতিৰ জলকীয়া পৰীক্ষামূলক ভাৱে উৎপাদন কৰিছে। তদুপৰি ইয়াৰ বীজ উৎপাদন আৰু সংৰক্ষণৰ বাবে তেওঁ প্ৰচেষ্টা অব্যাহত ৰাখিছে। উত্তৰ পূৰ্বাঞ্চলৰ অৰুণাচল প্ৰদেশ আৰু নাগালেণ্ডত তেওঁ মহিলাৰ মাজত গোট গঠন কৰি কবিৰ বীজ পৰীক্ষামূলক ভাবে উৎপাদন কৰাত সফল হৈছে।
ইয়াৰ উপৰিও বিভিন্ন প্ৰজাতিৰ জিকা, বেঙেনা আদিৰ বীজ উৎপাদন কৰি উত্তৰ পূৰ্বাঞ্চলৰ বিভিন্ন কৃষকক যোগান ধৰিবলৈ সক্ষম হৈছে এইজন যুৱক। বিশেষকৈ জৈৱিক কৃষি কৰ্মক গুৰুত্ব দি অহা নিলমে কেঁচু সাৰ উৎপাদন কৰি সফলতা লাভ কৰি আহিছে। বৰ্তমান নীলমে অভিলেখ সংখ্যক কেঁচু সাৰ বাহিৰলৈ প্ৰেৰণ কৰি আশাৰ বতৰা কাঢ়িয়াই আনিছে। ইয়াৰ উপৰি নীলমৰ কৃষি পামত আছে কুৰি তাৰো অধিক পুখুৰী।যত বিভিন্ন প্ৰজাতিৰ মাছৰ পোনা উৎপাদন কৰাৰ লগতে মাছ বিক্ৰী কৰি স্বাৱলম্বী হোৱাৰ লগতে সমগ্ৰ পাম খনত ২০/২৫ জন নিবনুৱা যুৱক যুৱতীক কৰ্ম সংস্থাপন দিবলৈ সক্ষম হৈছে ।
নীলম দত্তৰ এই পামত আছে ২৫/৩০জনী উন্নত মানৰ গাই গৰু। ইয়াৰ পৰা গাখীৰ উৎপাদন কৰিও লাভৱান হয় তেওঁ। ধান খেতি আৰু অন্যান্য খেতিৰ লগতে মধুৰীয়াম আদি ফলমূলৰ খেতি কৰিও যথেষ্ট লাভবান হৈছে তেওঁ। শেহতীয়াকৈ তেওঁ ৮০ বিঘাৰো অধিক এই পাম খন পৰিৱেশ আৰু বন্ধুত্ব মূলক পৰ্যটন কেন্দ্ৰ হিচাবে গঢ় দিয়াৰ প্ৰচেষ্টা চলাইছে। যাৰ বাবে বিদেশী পৰ্যটক থাকিব পৰাকৈ সাজি উলিয়াইছে কেইবাটাও আলহী গৃহ। পৰ্যটনৰ বাবে তেওঁ টকৌ পাত, বাঁহ আদিৰে শেহতীয়া ভাবে সাজিছে চুবুৰীয়া ৰাজ্য অৰুণাচল প্ৰদেশৰ ঘৰৰ আৰ্হিৰ এটা চাং ঘৰ। ভিতৰত জুই পুওৱাৰ ব্যৱস্থা থকা এই ঘৰটোত ধুনীয়াকৈ সজাই তোলা হৈছে আলহী থাকিব পৰা আৰু বহিব পৰা কোঠা। আনকি নিলমৰ পুখুৰীত পৰেহি শৰালী, শামুকখোলা, বৰটোকোলাকে ধৰি বিভিন্ন প্ৰজাতিৰ চৰাই। যাৰ বাবে এতিয়া নিলমে নিজৰ এটা পুখুৰীত চৰাইবোৰে কণী পাৰি পোৱালী জন্ম দিয়াৰো ব্যৱস্হা কৰি দিছে। ইয়াৰ উপৰি প্ৰতি বছৰে দেশ বিদেশৰ পৰা আৰু স্থানীয় ভাৱে বহু লোকে প্ৰত্যক্ষ কৰে নীলমৰ এই সুন্দৰ পাম খন। পামত থকা প্ৰশিক্ষণ কেন্দ্ৰত বিভিন্ন কৃষকক প্ৰশিক্ষণ প্ৰদান কৰি আহিছে এইজন যুৱ কৃষকে।
