◊ বাল্য বিবাহৰ দৰে সামাজিক ব্যাধি প্ৰতিৰোধ কৰি ছাত্ৰীৰ শৈক্ষিক উত্তৰণৰ বাবে আৰম্ভ কৰা এই আঁচনিৰ অধীনত আজি শিৱসাগৰ সমষ্টিৰ ১৫৭০ গৰাকী ছাত্ৰীক ‘মুখ্যমন্ত্ৰীৰ নিযুত মইনা’ আঁচনিৰ আৰ্থিক অনুদানৰ প্ৰথম কিস্তিৰ ধন বিতৰণ কৰা হয়। এই উপলক্ষে আজি শিৱসাগৰ নগৰৰ বৰ্ডিং খেল পথাৰত অনুষ্ঠিত অনুষ্ঠানত জিলা আয়ুক্ত আয়ুস গৰ্গৰ উপস্থিতিত অসম চৰকাৰৰ নগৰীয়া পানী যোগান আৰু পয় প্ৰণালীৰ অধ্যক্ষ কুশল দুৱাৰীয়ে ছাত্ৰী সকলক আনুষ্ঠানিক ভাৱে আঁচনিৰ ধনৰ ধনাদেশ পত্ৰ(চেক) প্ৰদান কৰে। গুৱাহাটীৰ লগতে জিলা খনৰ আমগুৰি, নাজিৰা, ডিমৌত সমান্তৰাল ভাৱে অনুষ্ঠিত অনুষ্ঠানত আজি জিলাখনৰ ৩৩৮০ গৰাকী ছাত্ৰীক এই আঁচনিৰ ধন বিতৰণ কৰা হয়।
উল্লেখযোগ্য যে এই আঁচনিৰ জৰিয়তে মহাবিদ্যালয় আৰু বিশ্ববিদ্যালয়ত উচ্চ শিক্ষা গ্ৰহণ কৰি থকা ছাত্ৰীসকলে প্ৰতিমাহে ৰাজ্য চৰকাৰৰ পৰা লাভ কৰিব এক নিৰ্দিষ্ট পৰিমাণৰ ধন। আঁচনিখনৰ জৰিয়তে একাদশ শ্ৰেণীত নামভৰ্তি কৰা ছাত্ৰীসকলে দুমাহ বাদ দি বাকী ১০ মাহে মাহেকত ১০০০ টকাকৈ ৰাজ্য চৰকাৰৰ পৰা লাভ কৰিব। তেওঁলোকে দ্বাদশ শ্ৰেণী উত্তীৰ্ণ নোহোৱা পৰ্যন্ত প্ৰতিমাহে নিজৰ বেংক একাউণ্টত এই ধন লাভ কৰিব। সেইদৰে স্নাতক মহলাত নামভৰ্তি কৰা ছাত্ৰীসকলে প্ৰতিমাহে ১২৫০ টকাকৈ লাভ কৰিব। আনহাতে স্নাতকোত্তৰ মহলাত আৰু বি এডত নামভৰ্তি কৰা ছাত্ৰীসকলে প্ৰতিমাহে লাভ কৰিব ২৫০০ টকাকৈ। জুন আৰু জুলাই মাহক বাদ দি বাকী ১০ মাহত প্ৰতিমাহে ছাত্রীসকলে নিজৰ একাউণ্টত এই ধন লাভ কৰিব।
