সাহিত্য হৈছে এক সাধনা ৷ এই সাধনাত বহু কম লোকে নিমগ্ন হোৱা দেখা যায় ৷ জ্ঞান পিপাসু লোকেহে কোনো ধৰনৰ পাৰিশ্ৰমিক নোহোৱাকে নিৰৱে সাহিত্যৰ সাধনাত ৰত হয় ৷ যি দৰে মম নিজে গলি আনক পোহৰাই তোলে ৷ সেইদৰেই সাহিত্য সাধকে নিজস্ব সাধনাৰে জগতক উদ্ভাষিত কৰি তোলে ৷ অথচ নিজৰ দুখ -বেদনা আৰু কষ্টক সংগোপনে মনৰ কোনত সাচি থয় ৷ সচাই সাহিত্যিকৰ মৰ্ম বেদনা কেইজনে জানিবলৈ চেষ্টা কৰে ? হয় , এয়া এক নিৰ্মম বাস্তৱ সত্য ৷ যদিও প্ৰকৃতিৰ বৈচিত্ৰময় ৰহস্য ভেদ কৰিব পৰা অজান মুলুকলৈ যোৱা সাহিত্যিকৰ এক চাৰিত্ৰিক বৈশিষ্ট্য ৷ এনেদৰেই উজাই যোৱা এগৰাকী জনজাতীয় মুলৰ কাৰ্বি সম্প্ৰদায়ৰ এগৰাকী যুৱক চন্দ্ৰসিং ৰংপী ৷ নিচেই কম বয়সৰ পৰাই সাহিত্য চৰ্চাৰ ধাৰা অব্যাহত ৰাখিছে ৷ এসময়ৰ সন্ত্ৰাসজৰ্জৰ অসম অৰুণাচল সীমান্তৱৰ্তীৰ ১ নং দিলীচাং গাওঁৰ অতি দৰিদ্ৰ পৰিয়ালত জন্ম গ্ৰহন কৰা চন্দ্ৰসিং ৰংপী এতিয়া এগৰাকী সুসাহিত্যিক ৰূপে পৰিচিত ৷ পিতৃ দিন হাজিৰা কৰা লোক আৰু মাতৃ ঘৰখন ইত্যাদি দিশত চোৱাচিতা কৰা এগৰাকী নিৰক্ষৰ মহিলা ৷ পৰিস্থিতিয়ে দুখ বেদনাৰ দিশলৈ ঠেলি দিলেও মনৰ ঐকান্তিক প্ৰচেষ্টাত দুই পুত্ৰক পঢ়াই শুনাই যোগ্যবান কৰি তুলিলে ৷ হয়তো তেওঁলোকৰ বাবে এয়া আছিল এক প্ৰত্যাহ্বান ৷ যদিও হাজাৰ প্ৰত্যাহ্বানক নেওচি অনুকুল অৱস্থালৈ অনা পিতৃ মাতৃৰ ঐকান্তিক প্ৰচেষ্টাক শলাগ লবই লাগিব ৷ এক শুভ ক্ষণ ১৯৯৪ চনৰ ১০ জুলাই তাৰিখে জন্মগ্ৰহণ কৰে চন্দ্ৰসিং ৰংপীয়ে ৷পিতৃৰ নাম ঁ মহৰী ৰংপী আৰু মাতৃৰ নাম চাৰণে বেপী ৷ দুখ দৰিদ্ৰৰ মাজত ডাঙৰ দীঘল হোৱা চন্দ্ৰসিঙে বাল্যকালতো কঠিন সংগ্ৰামৰ মাজত জীৱন অতিবাহিত কৰিছিল ৷ পখিলা খেদা বয়সত ক্ষুধাৰ তাড়নাত মাতৃৰ লগত বজাৰত বিভিন্ন ধৰনৰ শাকপাচলি বেচি জীৱন নিৰ্বাহ কৰিবলগা হৈছিল ৷ আনকি কিশোৰ বয়সত চন্দ্ৰসিঙে বজাৰত নাৰিকলৰ টুকুৰাও বেচি কঠিন পৰিস্থিতিৰ সৈতে যুঁজ দিছিল ৷ এনে এক দুঃসময়ৰ মাজত ক্ষিণ আশা লৈ স্থানীয় দিলীচাং প্ৰাথমিক বিদ্যালয়ত নামভৰ্তি কৰি শিক্ষাৰ জীৱন পাতনি মেলে ৷ বাল্য কালৰ পৰা মেধাৰ পৰিচয় দিয়া কিশোৰ গৰাকী পিছলৈ ঘুৰি চাবলগীয়া নহ’ল ৷ নিজৰ একানপটীয়া চেষ্টাত বালিচাং মধ্য ইংৰাজী বিদ্যালয়ৰ পৰা শিক্ষা সাং কৰে ৷ আৰু বালিচাং উচ্চ ইংৰাজী বিদ্যালয়ৰ পৰা পঢ়ি হাইস্কুল শিক্ষান্ত পৰীক্ষাত সুখ্যাতিৰে উত্তীৰ্ণ হয় ৷ পৰ্যায় ক্ৰমে দলংগুৰি উচ্চতৰ মাধ্যমিক বিদ্যালয়ৰ পৰাও উচ্চতৰ মাধ্যমিক পৰীক্ষা উত্তীৰ্ণ হৈ বিশ্বনাথ মহাবিদ্যালয়ৰ পৰা স্নাতক ডিগ্ৰী লাভ কৰে ৷ এইদৰে কঠিন পৰিস্থিতিৰ মাজতো হাৰ নামানি নিজৰ ঐকান্তিক প্ৰচেষ্টাত আইনৰ ডিগ্ৰী লবলৈ মন মেলি অৱশেষত আৰ্থিক দৈন্যতাৰ বাবে সেয়া সম্ভৱ হৈ নুঠিল ৷ অৱশ্যে চতিয়া নৰ্মাল স্কুলৰ পৰা D.El.Ed সম্পুৰ্ণ কৰে ৷ চন্দ্ৰসিঙে মেট্ৰিক পৰীক্ষা উত্তীৰ্ণ হোৱাৰ পাছৰে পৰাই নিজা খৰছৰ বাবে টিউচন আদি কৰিব লগা হৈছিল ৷ ইফালে পঢ়ি থকাৰ সময়ছোৱাত আমৰি কাৰ্বি ছাত্ৰ সন্থাৰ নীতি আদৰ্শৰ প্ৰতি আকৃষ্ট হৈ সাংগঠনিক তথা সমাজসেৱা মুলক কাম কৰাৰ বাবেও বেচ যত্নপৰ হৈছিল ৷ সন্থাৰ সাংগঠনিক কামকাজৰ মাজত সমাজসেৱাৰ কাৰ্যতো আত্মনিয়োগ কৰে ৷ আমৰি কাৰ্বি ছাত্ৰ সন্থাৰ যোগেদি কাৰ্বি সমাজৰ মাজত বিশেষকৈ শৈক্ষিক সজাগতাৰ ওপৰত কাম কৰাৰ লগতে জনগোষ্ঠীটোৰ উত্তৰণত বিভিন্ন ধৰণৰ কাৰ্যসুচী হাতত লয় ৷ পিছলৈ তেওঁৰ কাৰ্য দক্ষতাৰ স্বীকৃতি স্বৰূপে অতি কম বয়সতে অবিভক্ত শোণিতপুৰ জিলা আমৰি কাৰ্বি ছাত্ৰ সন্থাৰ সাধাৰণ সম্পাদকৰ পদত অধিষ্ঠিত হবলৈ সক্ষম হয় ৷ সমাজসেৱাৰ প্ৰতি অদম্য হেপাহ থকা যুৱকজনে ২০১২ চনত দিলীচাং যুৱক সংঘৰ সাধাৰণ সম্পাদকৰ পদৰ দৰে গুৰুদায়িত্ব লৈ কাৰ্বি জাতীয় উৎসৱ , পাৰ্বন তথা সাংস্কৃতিক দিশত কাম কৰিব লয় ৷ জনগোষ্ঠীয় কলা কৃষ্টি বিকাশ তথা প্ৰচাৰ আৰু প্ৰসাৰৰ বাবে সাংস্কৃতিক কাৰ্যসুচী লৈ কাম কৰি জাতীয় সংহতি স্থাপনৰ বাবে প্ৰাণপণে চেষ্টা কৰে ৷ কেৱল সিমানে নহয় ; এই ধাৰা অব্যাহত ৰখা যুৱক জনে কাৰ্বি সংসাৰী যুৱ পৰিষদৰ কেন্দ্ৰীয় সমিতিৰ মুখ্য উপদেষ্টা পদৰ আসন অলংকিত কৰে ৷ সাহিত্যৰ সংগঠক ৰূপেও বিশ্বনাথ জিলা কাৰ্বি সাহিত্য সভাক তেওঁৰ প্ৰচেষ্টাত পুনৰ উজ্জীৱিত হয় ৷ আৰু ২০১৯ চনত বিশ্বনাথ জিলা কাৰ্বি সাহিত্য সভাৰ সাধাৰণ সম্পাদকৰ পদৰ দৰে গুৰু দায়িত্ব লৈ কাৰ্বি সাহিত্যৰ উত্তৰণত কাম কৰে ৷ ভাল বক্তা হিচাবেও সুখ্যাতি লাভ কৰা যুৱ সাহিত্য সংগঠক জনে Karbi Anglong Singging Supar Star ত এংকৰ হিচাবে সেৱা আগবঢাই ৷ আনকি উত্তৰ পুব ভাৰতৰ সৰ্ব বৃহৎ আৰু আটাইতকৈ পুৰণি কাৰ্বি যুৱ মহোৎসৱত বিশ্বনাথৰ পৰা পোন প্ৰথমবাৰৰ বাবে ২০২১ চনত এংকৰ দৰে গুৰুত্বপুৰ্ণ দায়িত্ব পালন কৰি সুনাম আৰ্জে ৷ ইয়াৰ উপৰিও ছাত্ৰ সংগঠনৰ কাৰ্যকালত গ্ৰীষ্মকালীন বন্ধৰ সময়ছোৱাত দলংগুৰি , বালিচাং , ভেলৌগুৰি , চেলাইখাতি আদি অঞ্চলত ছাত্ৰছাত্ৰীক বিনামূলীয়াকৈ পাঠদান কৰাৰ সমান্তৰালকৈ হাইস্কুল আৰু উচ্চতৰ মাধ্যমিক পৰ্যায়ৰ অনুত্তীৰ্ণ হোৱা ছাত্ৰ-ছাত্ৰী সকলকো বিনামুলীয়াকৈ পাঠদান কৰাই পুনৰ পৰীক্ষাত অৱতীৰ্ণ কৰোৱাইছিল ৷ এনে কাৰ্যত ৰাইজৰ পৰা যথেষ্ট সমাদৰ লাভ কৰে ছাত্ৰ নেতা গৰাকীয়ে ৷ আনহাতে সততে জাতীয় জ্বলন্ত সমস্যাৰাজি অভাৱ অভিযোগৰ সন্দৰ্ভত আমৰি কাৰ্বি ছাত্ৰ সন্থাই মাত মাতি অহা কেইবাবাৰো পথ অৱৰোধ , ৰেলপথ অৱৰোধ , মহকুমা বন্ধৰ দৰে কাৰ্যসুচী তেওঁৰ নেতৃত্বত ৰূপায়িত হৈছিল ৷ মহকুমা বন্ধ ঘোষণাৰ দৰে কাৰ্যসুচী ৰূপায়ণ কৰিব যাওঁতে শোণিতপুৰ জিলা আমৰি কাৰ্বি ছাত্ৰ সন্থাৰ ৬৫ জনকৈ সংগঠনৰ নেতা কৰ্মী সকলে গ্ৰেপ্তাৰ হবলগীয়া হৈছিল ৷ শোণিতপুৰ জিলা আমৰি কাৰ্বি ছাত্ৰ সন্থাৰ উথথানেই চৰ্চিত হৈছিল সমগ্ৰ জিলাখনত ৷ এনেদৰেই বিপ্লৱী ধাৰাৰ মাজেৰেই সমানে সাহিত্য চৰ্চা কৰি কেইবাখনো মুল্যবান গ্ৰন্থ আৰু কবিতা পুথি
প্ৰকাশ কৰি উলিয়াই ৷ ইয়াৰ ভিতৰত ২০১৩ চনতেই প্ৰথম কাৰ্বি ভাষাৰ কবিতা পুথি হল “ইথাক আমানাই ”সফল পুৰ্বক প্ৰকাশ পাই ৷ ২০১৪ চনত আন এখন “লাৰ তামন“ নামৰ কবিতা পুথি প্ৰকাশ কৰে ৷ ইয়াৰ পাছত পৰ্যায়ক্ৰমে “লংৰি আহাৰচি” , “চেংৱে কাংজে আমিহি ” “মিৰলিন আচেংৱে” আৰু “ চিক্ল কাংজিৰ থেকদেত আজ” নামৰ এই পৰ্যন্ত সৰ্বমুঠ ৫ খনকৈ কবিতা পুথি প্ৰকাশ কৰিবলৈ সক্ষম হয় ৷ পিছলৈ আৰু উভতি চাব লগা নহল ৷ “ জি. কে. ফৰ কিডচ ” আৰু “ এ হৰিফাইং ড্ৰিম ৱিথ এ বিট ফান ” নামৰ দুখন ইংৰাজী ভাষাত গ্ৰন্থ প্ৰকাশ কৰি সাহিত্যিক হিচাবে প্ৰতিষ্ঠা লাভ কৰে ৷ সম্প্ৰতি চন্দ্ৰসিঙে লেখা গ্ৰন্থ আৰু কবিতা পুথি সমুহ পঢ়ুৱৈ সমাজৰ মাজত ব্যাপক জনপ্ৰিয়তা লাভ কৰে ৷ ইয়াৰ উপৰিও বিভিন্ন কাকত , আলোচনীত প্ৰবন্ধ , কবিতা আদি নিয়মিত লেখা মেলা কৰি আছে ৷ উল্লেখ্য যে কাৰ্বি সমাজৰ মাজত সাহিত্যিক সংখ্যা আঙুলিৰ মুৰত লেখিব পৰা ৷ সাহিত্য পৰ্যায়ৰ লেখামেলা কৰা বা সাহিত্যৰ প্ৰতি অনিহা প্ৰকাশ কৰে কাৰ্বি সমাজৰ প্ৰায় সংখ্যক শিক্ষিত লোকে ৷ এনে এক পৰিবেশৰ মাজতেই অসম অৰুণাচল সীমান্তৱৰ্তীৰ বিশ্বনাথৰ সুসাহিত্যিক গৰাকীয়ে কাৰ্বি সমাজৰ সাহিত্যৰ বিশেষ অৱদান আগবঢ়াই ৷ আৰু জিলাখনত সৰ্বত্ৰে জনপ্ৰিয়তা লাভ কৰে ৷ শেহতীয়াকৈ সংবাদিকৰ প্ৰতি আকৰ্ষিত হোৱা সাহিত্যিক গৰাকী সংবাদসেৱাও কৰি আছে ৷ তেওঁৰ নিজা তত্বাৱধানত “বিশ্বনাথ কাৰ্বি লাইভ” নামৰ ৱেভ পৰ্টেলৰ যোগেদি উত্তৰপুৱক সামৰি সংবাদ সেৱা পৰিবেশন কৰি এক উচ্চস্তৰীয় সংবাদ প্ৰতিষ্ঠান হিচাবে গঢ় দিবলৈ সক্ষম হৈছে ৷ বৰ্তমান বিশ্বনাথ কাৰ্বি লাইভে জনপ্ৰিয়তা শীৰ্ষত ৷ কাৰ্বি আংলঙতো এই চেনেলৰ যথেষ্ট প্ৰভাৱ আছে ৷ এই দৰেই সাহিত্য , সংবাদসেৱা , তথা ৰাজহুৱা সেৱাৰ প্ৰতি নিজকে উৎসৰ্গা কৰি কাম কৰি আছে ৷ যদিও কম বয়সত সাহিত্যিক হিচাবে প্ৰতিষ্ঠা লাভ কাৰ্বি সমাজৰ নাই বুলি কলেও বঢ়াই কোৱা নহ’ব ৷ একাধিক জাতীয় সংগঠন , অনুষ্ঠান , প্ৰতিষ্ঠানে তেওঁৰ অৱদানৰ স্বীকৃতি স্বৰূপে বিভিন্ন সময়ত সম্বৰ্দ্ধিত হয় ৷ কাৰ্বি আংলংৰ ডিফুতো “ জামবিলি লিটাৰেৰি ফাউণ্ডেচনে আয়োজন কৰা অনুষ্ঠানত “বেষ্ট পয়েম এৱাৰ্ড ” লাভ কৰে ৷ বিশ্বনাথতো অনুষ্ঠিত হোৱা নেপালী সাহিত্য সভাই বিশিষ্ট কবি হিচাবে সম্বৰ্ধনা জনাই , ৷ তদুপৰি কাৰ্বি যুৱ মহোৎসৱত যুৱ কবি হিচাবে চন্দ্ৰসিং বিশেষভাবে সম্বৰ্দ্ধিত হয় ৷ সম্প্ৰতি কাৰ্বি ভাষাত দুখন গ্ৰন্থ অতি শীঘ্ৰেই প্ৰকাশ পাব বুলি সাহিত্যিক গৰাকীয়ে জানিব দিয়ে ৷
লেখকঃ ৰমেশ চন্দ্ৰ চৰেণ
বিশ্বনাথ চাৰিআলি
