ৰঙিয়া জিলা কাৰাটেৰ সন্থাৰ উদ্যোগত আন্তঃক্লাৱ কাৰাটে প্ৰতিযোগিতা
ৰঙিয়া,১৯ আগষ্ট
অসম অলিম্পিক সন্থাৰ অন্তৰ্গত অসম কাৰাটে সন্থাৰ স্বীকৃতিপ্ৰাপ্ত ৰঙিয়া জিলা কাৰাটে সন্থাৰ উদ্যোগত অহা ২১ আগষ্ট দেওবাৰে দিনযোৰা কাৰ্যসূচীৰে এখনি আন্তঃক্লাৱ কাৰাটে প্ৰতিযোগিতাৰ আয়োজন কৰা হৈছে।
অতি আড়ম্বৰপূৰ্ণ ভাৱে আয়োজন কৰা প্ৰতিযোগিতাখনিত ৰঙিয়া জিলা কাৰাটে সন্থাৰ অন্তৰ্গত প্ৰায় ২০ টা ক্লাৱৰ প্ৰতিযোগীয়ে অংশগ্ৰহণ কৰিব৷বিজয়ী প্ৰতিযোগী সকলক মেডেলসহ মানপত্ৰ আৰু অংশগ্ৰহণ কৰা সকলো প্ৰতিযোগীক অংশগ্ৰহণৰ প্ৰমাণপত্ৰ দিয়া হ’ব৷
উক্ত প্ৰতিযোগিতাত প্ৰথম আৰু দ্বিতীয় পুৰস্কাৰপ্ৰাপ্ত প্ৰতিযোগীসকলে আগন্তুক ৰাজ্যিক ভিত্তিত অনুস্থিত হ’ব লগা প্ৰতিযোগিতাৰ বাবে যোগ্যতা অৰ্জন কৰিব৷
প্ৰতিযোগিতাখনি সুচাৰুৰূপে পৰিচালনা কৰাৰ উদ্দেশ্যে ইতিমধ্যে নিপন ভূঞা আৰু দুদুল শালৈক ক্ৰমে সভাপতি আৰু সম্পাদক হিচাবে লৈ এখন উচ্চস্তৰীয় অভ্যৰ্থনা সমিটি গঠন কৰা হৈছে।
ৰঙিয়াৰ বুনিয়াদী প্ৰশিক্ষণ কেন্দ্ৰ প্ৰাঙ্গণত অনুস্থিত হ’ব লগা প্ৰতিযোগিতাখনি সাফল্যমণ্ডিত কৰাৰ বাবে ৰঙিয়া জিলা কাৰাটে সন্থাৰ সভাপতি,স্থানীয় বিধায়ক তথা ৰাজ্যিক বিজেপিৰ সভাপতি ভৱেশ কলিতা আৰু সম্পাদক,আন্তৰাষ্ট্ৰীয় খেলুৱৈ তথা প্ৰশিক্ষক চৈয়দ মাজহাৰুল ইছলামে সকলোৰে সহযোগিতা আন্তৰিকতাৰে কামনা কৰিছে।
অনুষ্ঠানৰ লগত সংগতি ৰাখি সন্ধিয়া এখনি সাংস্কৃতিক সমাৰোহৰো আয়োজন কৰা হৈছে,য’ত জনপ্ৰিয় কণ্ঠশিল্পী বিকুল শইকীয়া আৰু বনশ্ৰী দেৱীয়ে গীত পৰিবেশন কৰিব বুলি উদ্যোক্তাসকলে জনাইছে ।
