মাহেকীয়া বাৰ্তাপখিলীৰ পুষ্পাদেৱী জালান সোঁৱৰণি সাহিত্য বঁটা ডঃ মুক্তা বিশ্বাসলৈ

গুৱাহাটীঃ গুৱাহাটীস্থিত বিশাল প্ৰকাশনৰ পৰা প্ৰকাশিত ভাষা-সাহিত্য-সংস্কৃতিৰ পূৰ্ণাংগ আলোচনী ‘মাহেকীয়া বাৰ্তাপখিলী’য়ে ২০১২ চনৰপৰা চল্লিশোধৰ্ৰ লেখিকাক সৰবৰহী মহিলা পুষ্পাদেৱী জালানৰ সোঁৱৰণত সাহিত্য প্ৰতিযোগিতা অনুষ্ঠিত কৰি পুৰস্কৃত কৰি আহিছে৷ এই প্ৰতিযোগিতাত চল্লিশোৰ্ধৰ লেখিকা এগৰাকীৰ শ্ৰেষ্ঠ প্ৰবন্ধ-নিবন্ধ সংকলনখন নিৰ্বাচকমণ্ডলীৰ দ্বাৰা বাছনি কৰি ‘পুষ্পাদেৱী জালান সোঁৱৰণি বঁটা’ প্ৰদান কৰা হয়৷ ‘বাৰ্তাপখিলী’ৰ ত্ৰিশ বৰ্ষত পদাৰ্পণ আৰু সৰবৰহী মহিলা পুষ্পাদেৱী জালানৰ ত্ৰয়োদশ মৃত্যু বাৰ্ষিকী উপলক্ষে প্ৰদান কৰিব লগা ২০২৪ বৰ্ষৰ বঁটাৰ বাবে নিৰ্বাচকমণ্ডলীয়ে গুৱাহাটী বিশ্ববিদ্যালয়ৰ সংস্কৃত বিভাগৰ অৱসৰপ্ৰাপ্ত মুৰব্বী অধ্যাপিকা ডঃ মুক্তা বিশ্বাসক নিৰ্বাচিত কৰিছে ‘উপনিষদৰ ভাবাদৰ্শত মানৱতাবাদ’ শীৰ্ষক প্ৰবন্ধ সংকলনৰ বাবে৷

উল্লেখ্য যে গুৱাহাটী বিশ্ববিদ্যালয়ৰ পৰা সংস্কৃতত স্নাতকোত্তৰ শ্ৰেণীত প্ৰথম শ্ৰেণীৰ প্ৰথম হৈ তিনিটাকৈ স্বৰ্ণপদক লাভ কৰি পৰৱতী সময়ত একেখন বিশ্ববিদ্যালয়তে অধ্যাপিকাৰূপে কৰ্মজীৱন আৰম্ভ কৰা ডঃ মুক্তা বিশ্বাসৰ তত্ত্বাৱধানত ১৬গৰাকী গৱেষে¸ক পি এইচ ডি আৰু এম ফিল উপাধি লাভ কৰিছে৷ বিভিন্ন বঁটাৰে সন্মানিত ডঃ বিশ্বাসে বিভিন্ন আন্তঃৰাষ্ট্ৰীয় আলোচনা চক্ৰ আৰু সন্মিলনত যোগদান কৰি অধ্যাপিকা হিচাপে কানাডা, থাইলেণ্ড, বাংলাদেশ আদি দেশ ভ্ৰমণ কৰিছে৷ তেখেত বৰ্তমান কেবাখনো বিশ্ববিদ্যালয়ৰ বিদ্যায়তনিক চৰ্চাৰ সৈতে জড়িত হৈ আছে৷ উল্লেখ্য যে ত্ৰয়োদশ বৰ্ষৰ ‘পুষ্পাদেৱী জালান সোঁৱৰণি সাহিত্য বঁটা’ অহা ৩ নৱেম্বৰ, ২০২৪ তাৰিখে দিনৰ ১১ বজাত গুৱাহাটী প্ৰেছ ক্লাবত এটি গাম্ভীৰ্যপূৰ্ণ অনুষ্ঠানত প্ৰদান কৰা হ’ব বুলি দাতা পৰিয়ালৰ তৰফৰপৰা গোপাল জালান আৰু ‘বাৰ্তাপখিলী’ৰ সম্পাদক ব্ৰজেন্দ্ৰ নাথ ডেকাই জানিবলৈ দিয়ে৷ এই বঁটাৰ লগত ২১,০০০ [একৈশ হাজাৰ] টকা, স্মাৰক, গ্ৰন্থৰ টোপোলা আৰু মানপত্ৰ থাকিব৷