পি এম কিষান (PM-Kishan) আঁচনিৰ অধীনত ১৭ নং কিস্তিৰ ধনৰাশি লাভ কৰি উৎফুল্লিত বিশ্বনাথৰ কৃষক
•জিলাখনৰ ৩৬,৮৩৩ গৰাকী যোগ্য কৃষকৰ বেংক একাউন্টত প্ৰত্যক্ষভাবে সোমাল আঁচনিৰ ১৭নং কিস্তিৰ ধনৰাশি
অসম খবৰ বিশ্বনাথ চাৰিআলি, ১৯ জুন: প্ৰধানমন্ত্ৰী নৰেন্দ্ৰ মোডীয়ে কালি অৰ্থাৎ ১৮ জুন, ২০২৪ তাৰিখ মঙলবাৰে ‘প্ৰধানমন্ত্ৰী কৃষক সন্মান নিধি’ (PM- Kisan) আঁচনিৰ অধীনত যোগ্য হিতাধিকাৰী কৃষকসকললৈ ১৭ নং কিস্তিৰ অনুদান হস্তান্তৰ কৰে। উত্তৰ প্ৰদেশৰ বাৰাণসীৰ পৰা “Live Webcast” প্ৰক্ৰিয়াৰ জৰিয়তে প্ৰধানমন্ত্ৰী গৰাকীয়ে প্ৰায় ৯ কোটি ৩০ লাখ হিতাধীকাৰী কৃষকৰ একাউণ্টলৈ প্ৰায় ২০ হাজাৰ কোটি টকা প্ৰত্যক্ষ হস্তান্তৰ (DBT) প্ৰক্ৰিয়াৰ জৰিয়তে হস্তান্তৰ কৰে। সেই উপলক্ষে বিশ্বনাথ জিলা কৃষি বিভাগৰ উদ্যোগত বিয়লি ৪ বজাৰ পৰা জিলা কৃষি বিষয়াৰ কাৰ্যালয়ৰ প্ৰেক্ষাগৃহত জিলা প্ৰশাসনৰ সহযোগত কৃষকসকলৰ সুবিধাৰ্থে কেন্দ্রীয়ভাৱে এখন সভা তথা অনুষ্ঠানৰ পোনপটীয়া সম্প্ৰচাৰৰ আয়োজন কৰা হয়। জিলা কৃষি বিষয়া বাণেশ্বৰ বেৰ সঞ্চালনত কেন্দ্ৰীয় ভাৱে আয়োজিত উক্ত অনুষ্ঠানত বিশিষ্ট অথিতি ৰূপে উপস্থিত থাকে জিলাৰ অতিৰিক্ত আয়ুক্ত ( কৃষি) ধ্ৰুৱজ্যোতি দাস। অতিৰিক্ত জিলা আয়ুক্ত গৰাকীয়ে কেন্দ্ৰীয় চৰকাৰৰ এই প্ৰচেষ্টাক প্ৰশংসা কৰি অনাগত সময়ত এই আচঁনিৰ দ্বাৰা কৃষক সকল যথেষ্ট লাভাম্বিত হ’ব বুলি প্ৰকাশ কৰে।
মহকুমা কৃষি বিষয়া প্ৰদীপ তালুকদাৰ, জ্যেষ্ঠ কৃষি উন্নয়ন বিষয়া সোণ মণি শইকীয়া, মানস প্ৰতীম দাসৰ লগতে শতাধিক কৃষক ৰাইজে অংশ গ্ৰহণ কৰি অনুষ্ঠানটো সাফল্যমণ্ডিত কৰি তোলে। ইয়াৰ উপৰি অনুষ্ঠানৰ অংশ স্বৰূপে জিলা কৃষি বিভাগৰ উদ্যোগত ভিএনঅ(VNO)ৰ সহযোগত জিলাখনৰ আটাইকেইটা কৃষি চক্ৰ সামৰি বিভিন্ন গাওঁ পঞ্চায়তত কৃষক ৰাইজৰ বাবে প্ৰধানমন্ত্ৰী কৃষক সন্মান নিধিৰ সপ্তদশ কিস্তি মুকলি অনুষ্ঠানৰ পোনপটীয়া সম্প্ৰচাৰৰ ব্যৱস্থাও কৰা হয়।
উল্লেখ্য যে বিশ্বনাথ জিলা কৃষি বিভাগৰ অধীনত সৰ্বমূঠ ৩৬,৮৩৩ গৰাকী যোগ্য হিতাধীকাৰীয়ে প্ৰধানমন্ত্ৰী কৃষক সম্মান নিধিৰ ১৭ নং কিস্তি লাভ কৰাৰ লগতে দেশৰ প্ৰায় ৯.৩০ কোটি পি. এম. কিষাণ আঁচনিৰ যোগ্য হিতাধীকাৰীৰ একাউণ্টলৈ এই Live webcast অনুষ্ঠানৰ জৰিয়তে প্ৰধানমন্ত্ৰী গৰাকীয়ে কিস্তিৰ ধন হস্তান্তৰ কৰে। উক্ত অনুষ্ঠানত সংশ্লিষ্ট কৃষি উন্নয়ন বিষয়া, কৃষি পৰিদৰ্শক, কৃষি সম্প্ৰসাৰণ সহায়ক সকলৰ লগতে বিভাগীয় বিষয়া-কৰ্মচাৰী সকলো উপস্থিত আছিল ।
