বিশ্বনাথত জিলা আয়ুক্তৰ সংবাদমেল
বিশ্বনাথ নিৰ্বাচন জিলাৰ বাবে লোকসভা নিৰ্বাচন, ২০২৪ৰ সময়সূচী প্ৰকাশ
বিশ্বনাথ ১৭ মাৰ্চঃ_ সমাগত লোকসভা নিৰ্বাচন, ২০২৪ৰ দিন ঘোষনা কৰাৰ পাছতে আজি বিশ্বনাথৰ জিলা নিৰ্বাচনী বিষয়া তথা বিশ্বনাথৰ জিলা আয়ুক্ত ডাঃ নেহা যাদৱে এখন সংবাদমেল সম্বোধন কৰে। জিলা আয়ুক্তৰ কাৰ্যালয়ৰ সন্মিলন কক্ষত দিনৰ ১১ বজাত অনুষ্ঠিত হোৱা সংবাদমেলখনিত জিলা নিৰ্বাচনী বিষয়া তথা জিলা আয়ুক্ত গৰাকীয়ে ১১ নং শোণিতপুৰ লোকসভা সমষ্টিৰ অন্তৰ্গত বিশ্বনাথ নিৰ্বাচন জিলাৰ বাবে লোকসভা নিৰ্বাচন, ২০২৪ৰ সময়সূচী প্ৰকাশ কৰে। উল্লেখ্য যে, বিশ্বনাথ নিৰ্বাচনী জিলাত লোকসভা নিৰ্বাচনৰ বাবে ৭০ নং বিশ্বনাথ বিধানসভা সমষ্টি আৰু ৭১ নং বিহালী(অনুসূচীত জাতি) বিধানসভা সমষ্টিত ভোট গ্ৰহণ কৰা হ’ব। ভাৰতৰ নিৰ্বাচন আয়োগৰ ঘোষণা অনুসৰি সংবাদমেলত বিশ্বনাথৰ জিলা নিৰ্বাচনী বিষয়া গৰাকীয়ে প্ৰকাশ কৰা অনুসৰি প্ৰথম পৰ্যায়ত অনুষ্ঠিত হ’ব লগা লোকসভা নিৰ্বাচনত বিশ্বনাথ নিৰ্বাচনী জিলাৰ দুয়োটা বিধানসভা সমষ্টিত নিৰ্বাচনৰ জাননী জাৰি কৰা হ’ব ২০ মাৰ্চ তাৰিখে। সেইদৰে মনোনয়ন দাখিলৰ অন্তিম দিন হৈছে ২৭ মাৰ্চ। ২৮ মাৰ্চত এই মনোনয়ন পত্ৰ সমুহ পৰীক্ষা কৰা হ’ব আৰু ৩০ মাৰ্চত মনোনয়ন পত্ৰ প্ৰত্যাহাৰৰ অন্তিম দিন নিৰ্দ্ধাৰন কৰা হৈছে। অহা ১৯ এপ্ৰিলত ভোটগ্ৰহণ কৰা হ’ব আৰু ৪ জুনত ভোট গণনা সম্পন্ন হ’ব।
ভাৰতৰ নিৰ্বাচন আয়ুক্তই নিৰ্বাচনৰ সময়সূচী ঘোষনা কৰাৰ লগে লগেই বিশ্বনাথ নিৰ্বাচনী জিলাতো নিৰ্বাচনৰ আচৰণ বিধি বলবৎ হোৱাৰ কথা দোহাৰি জিলা নিৰ্বাচনী বিষয়া ডাঃ নেহা যাদৱে জিলাখনত নিকা আৰু মুক্ত নিৰ্বাচন অনুষ্ঠিত কৰাৰ বাবে সকলো সকলোধৰণৰ পদক্ষেপ গ্ৰহণ কৰা হৈছে বুলি প্ৰকাশ কৰি এই ক্ষেত্ৰত সকলোৰে সহযোগিতা কামনা কৰে।
উল্লেখ্য যে বিশ্বনাথ নিৰ্বাচনী জিলাৰ অন্তৰ্গত বিশ্বনাথ বিধানসভা সমষ্টিত ২১৮ টা ভোট কেন্দ্ৰত
১,৮৬,২৪৫ গৰাকী ভোটাৰে আৰু বিহালী (অনুসূচীত জাতি) বিধানসভা সমষ্টিত ১৭৬ টা ১,৫৪,০৩৭ গৰাকী ভোটদান কৰিব। আজিৰ সংবাদমেলত জিলা নিৰ্বাচনী বিষয়া তথা জিলা আয়ুক্ত ডাঃ নেহা যাদৱৰ উপৰিও জিলাখনৰ ৰাজনৈতিক দলসমূহৰ প্ৰতিনিধি তথা বিষয়ববীয়াসকল, বিশ্বনাথ জিলা পৰিষদৰ মুখ্য কাৰ্যবাহী বিষয়া দিগন্ত বৈশ্য, অতিৰিক্ত জিলা আয়ুক্ত ধ্ৰুৱজ্যোতি দাস, নিৰ্বাচনী বিষয়া প্ৰতীশা দত্ত, সহকাৰী আয়ুক্ত পুষ্পাংকৰ পাতিৰ প্ৰমুখ্যে বিষয়া আৰু কৰ্মচাৰীসকল উপস্থিত আছিল।
