বিজ্ঞান শাখাত তৃতীয় স্হানপ্ৰাপ্ত প্ৰাৰ্থনা প্ৰিয়ম শইকীয়াক বিশ্বনাথ প্ৰশাসনৰ অভিনন্দন
ভাৰতীয় প্ৰশাসনীয় সেৱাৰ বিষয়া হোৱাৰ প্ৰৱল ইচ্ছা কৃতী ছাত্ৰী গৰাকীৰ
বিশ্বনাথ চাৰিআলি, ৭ জুন: সদ্যঘোষিত উচ্চতৰ মাধ্যমিক চূড়ান্ত পৰীক্ষাৰ ফলাফলত বিজ্ঞান শাখাত অসমৰ ভিতৰতে তৃতীয় স্থান লাভ কৰি বিশ্বনাথলৈ গৌৰৱ কঢ়িয়াই অনা বিশ্বনাথৰ মেধাৱী ছাত্ৰী প্ৰাৰ্থনা প্ৰিয়ম শইকীয়াক আজি বিশ্বনাথ প্ৰশাসনে অভিনন্দন জ্ঞাপন কৰে। অতিৰিক্ত উপায়ুক্ত তথা বিশ্বনাথ মহকুমাৰ ভাৰপ্ৰাপ্ত মহকুমাধিপতি জয় শিবানী আৰু বিশ্বনাথৰ সহকাৰী আয়ুক্ত কংকনা শইকীয়াই কালি সন্ধিয়া কৃতী ছাত্ৰী প্ৰাৰ্থনা প্ৰিয়ম শইকীয়াক বিশ্বনাথ চাৰিআলিৰ নগাঁৱৰ বাসগৃহত গৈ শৰাই আৰু গামোচাৰে বিশ্বনাথ প্ৰশাসনৰ তৰফৰ পৰা অভিনন্দন জ্ঞাপন কৰে। উল্লেখ্য যে, নগাঁৱৰ ৰামানুজন ছিনিয়ৰ ছেকেণ্ডাৰী স্কুলৰ পৰা পৰীক্ষাত অৱতীৰ্ণ হৈ উচ্চতৰ মাধ্যমিক শিক্ষান্ত পৰীক্ষাত সৰ্বমুঠ ৪৭৯ নম্বৰেৰে অসমৰ ভিতৰত তৃতীয় স্থান (বিজ্ঞান শাখা) লাভ কৰি গৌৰৱ কঢ়িয়াই আনিবলৈ সক্ষম হয়। বিশ্বনাথক গৌৰৱান্বিত কৰা মেধাৱী ছাত্ৰী প্ৰাৰ্থনা প্ৰিয়ম শইকীয়াই ভৱিষ্যতে ভাৰতীয় প্ৰশাসনীয় সেৱাৰ এগৰাকী বিষয়া হোৱাৰ প্ৰৱল ইচ্ছা মনতে পুহি ৰাখিছে আৰু সদ্যহতে দিল্লী বিশ্ববিদ্যালয়ৰ অধীনত অধ্যয়ন কৰিব বুলি জানিবলৈ দিছে। বিশ্বনাথ চাৰিআলিৰ নগাঁও নিৱাসী শিক্ষক দম্পতী সর্বানন্দ শইকীয়া আৰু আল্পনা শইকীয়াৰ একমাত্ৰ কন্যা তথা মেধাৱী ছাত্ৰী প্ৰাৰ্থনা প্ৰিয়মৰ এই সফলতাত বিশ্বনাথবাসী বাৰুকৈয়ে উৎফুল্লিত হৈছে।
উল্লেখ্য যে প্ৰাৰ্থনাই দৈনিক হিচাপত কোনো সময় বান্ধি অধ্যয়ন কৰা নাছিল যদিও যিকণ সময় অধ্যয়ন কৰিছিল সেয়া মনপুতি আৰু একান্ত মনেৰে অধ্যয়ন কৰিছিল বুলি সদৰী কৰে। ঘৰুৱা টিউচনৰ কোনো ব্যৱস্থা নোলোৱাকৈ অধ্যয়ন কৰা প্ৰাৰ্থনাই ইংৰাজীত ৯১, অসমীয়াত ৯৬, পৰিসংখ্যা বিভাগত ৯৭, গণিতত ১০০, পদাৰ্থ বিজ্ঞানত ৯৫ আৰু ৰসায়ন বিজ্ঞানত ৯৩ লাভ কৰে। তেওঁৰ এই সফলতাৰ আঁৰত তেওঁৰ পিতৃ-মাতৃৰ লগতে ৰামানুজন ছিনিয়ৰ ছেকেণ্ডাৰী স্কুলৰ অধ্যক্ষ দিলীপ বৰা আৰু পূৰ্বতে তেওঁ অধ্যয়ন কৰা বিদ্যালয়ৰ শিক্ষক- শিক্ষয়িত্ৰীসকলৰ শলাগ লয়।
বিশ্বনাথবাসী শিক্ষানুৰাগী ৰাইজৰ লগতে বিশ্বনাথ প্ৰশাসনে প্ৰাৰ্থনাক আন্তৰিক অভিনন্দন জ্ঞাপন কৰাৰ লগতে ভৱিষ্যতে যেন তেওঁ শৈক্ষিক ক্ষেত্ৰখনত সফলতাৰে আগুৱাই যাব পাৰে তাৰেই কামনা কৰিছে।
