♦ পৰিৱেশ ৰক্ষাৰ নামত নাগৰিকৰ প্ৰতিবাদকো গুৰুত্ব নিদি অসম চৰকাৰে শিলসাঁকো বিলৰ ভূমিত উচ্ছেদ চলাই থকা সময়ত গুৱাহাটী মহানগৰৰ ‘গ্ৰীণ বেল্ট’ বুলি ঘোষিত ভূমিত এটা চক্ৰই ভূমি হস্তগত কৰাৰ অভিযানত নামি পৰিছে। বৃহত্তৰ বৰাগাঁও অঞ্চলত এই ভূ-মাফিয়া চক্ৰটো সক্ৰিয় হৈ পৰিছে।
গুৱাহাটী মহানগৰৰ ‘গ্রীণ বেল্ট’ বুলি ঘোষিত এলেকাত কোনো গৃহ নিৰ্মাণ কৰিব নোৱাৰিব বুলি ২০১৫ চনৰ ২৫ মাৰ্চত তদানীন্তন মুখ্যমন্ত্ৰীয়ে নির্দেশ দিছিল। গুৱাহাটী মহানগৰ জিলাৰ উপায়ুক্ত কাৰ্যালয়ৰ পৰা জি এম ডি এ আৰু মহানগৰ জিলাৰ ৰাজহ চক্ৰসমূহলৈ অসম চৰকাৰৰ নিৰ্দেশ কার্যকৰী কৰাৰ বাবে ২০১৫ চনৰ ২৩ এপ্ৰিলত পত্ৰ প্ৰেৰণ কৰিছিল। সেই সময়ত গুৱাহাটী উন্নয়ন দপ্তৰৰ দায়িত্বত থকা বৰ্তমানৰ মুখ্যমন্ত্ৰী ডঃ হিমন্ত বিশ্ব শৰ্মায়ো ‘গ্রীণ বেল্ট’ৰ ভূমি ৰক্ষাৰ বাবে শক্তিশালী স্থিতি গ্রহণ কৰিছিল।
পৰিতাপৰ বিষয়টো হ’ল অসম চৰকাৰৰ এনে কঠোৰ স্থিতি থকাৰ পিছতো বৃহত্তৰ বৰাগাঁও, আহোমগাঁও অঞ্চলত ‘গ্ৰীণ বেল্ট’ৰ ভূমি জনৈক শৰ্মা আৰু জনৈক চৌধুৰীৰ নেতৃত্বত এটা চক্রই মাটি পেলাই দখল কৰিবলৈ আৰম্ভ কৰিছে। এইক্ষেত্ৰত পৃষ্ঠপোষকতা কৰিছে ফাঁচিবজাৰৰ এগৰাকী জনৈক শৰ্মা নামৰ অধিবক্তাই।
অভিযোগ মতে এই অধিবক্তা শৰ্মাৰ সহযোগত ভূমিৰ প্ৰকৃত চৰকাৰী কাগজ-পত্ৰৰ পৰিৱৰ্তন কৰি এটা চক্ৰই ভূমি কেলেংকাৰীত লিপ্ত হৈ আছে। শৰ্মা আৰু চৌধুৰীয়ে গ্ৰীণ বেল্টৰ মাটিত ৰঙা মাটি ক’ৰ পৰা আনি পেলোৱা আৰম্ভ কৰিছে, ইয়াও এক ৰহস্যজনক। এইক্ষেত্ৰত স্থানীয় গড়চুক থানা নীৰৱ।
আন এক অভিযোগ মতে এই ভূমি-মাফিয়া চক্রই ইতিমধ্যে কেলেংকাৰীত নিমজ্জিত চাহাৰা গ্ৰুপ মালিকানাধীন ভূমি লৈ আন এক ভূমি হস্তগত কৰাৰ প্ৰক্ৰিয়াত জড়িত হৈ পৰিছে।
চৰকাৰৰ অগোচৰে এনে এচাম ভূ-মাফিয়াই গুৱাহাটী মহানগৰৰ ভূমিৰ ওপৰত চলাই থকা আগ্ৰাসনৰ ক্ষেত্ৰত চৰকাৰক বিশেষভাৱে গুৰুত্ব দিবলৈ সচেতন মহলে আহ্বান জনাইছে।
Leave a Reply