♦ ৰঙাপৰাঃ ৰাজ্যজুৰি অব্যাহত থকা বিশ্বৰ সৰ্ববৃহৎ বিনামূলীয়া টিকাকৰণ অভিযানৰ অংশস্বৰূপে শোণিতপুৰ জিলাত ৰাইজৰ সুবিধাৰ্থে স্থাপন কৰা কেইবাটাও কোভিড প্ৰতিষেধক প্ৰদান কেন্দ্ৰৰ এটা কেন্দ্ৰত আজি শোণিতপুৰ জিলা উপায়ুক্ত ভূপেশ চন্দ্ৰ দাসে পৰিদৰ্শন কৰে আৰু ৰাইজৰ সুবিধাৰ্থে গ্ৰহণ কৰা ব্যৱস্থাৰ বুজ লয়।
আজি দিনৰ ১ বজাত ৰঙাপৰা উন্নয়ন খণ্ডৰ অন্তৰ্গত ধুলাপাদুং চাহ বাগিচা কেন্দ্ৰীয় চিকিৎসালয়ত উপস্থিত হৈ ৰাইজৰ বিপুল সঁহাৰি প্ৰত্যক্ষ কৰি সন্তোষ প্ৰকাশ কৰে আৰু টীকাকৰণ অভিযান সুচাৰুৰূপে আগবঢ়াই নিব পাৰি তাৰ বাবে প্ৰয়োজনীয় ব্যৱস্থা গ্ৰহণ কৰিবলৈ জিলা উপায়ুক্তই বাগিচা কৰ্তৃপক্ষক আহ্বান জনায়।
সাংবাদিকৰ প্ৰশ্নৰ উত্তৰত উপায়ুক্ত ভূপেশ চন্দ্ৰ দাসে কয় যে চৰকাৰে নিৰ্ধাৰিত কৰি দিয়া ২৪ হেজাৰ ভেকচিন প্ৰদানৰ বিপৰীতে কালি শোণিতপুৰ জিলাত একে দিনাই ২৫ হেজাৰ ভেকচিন প্ৰদান কৰা হৈছে।যোৱা ২১ তাৰিখৰ পৰা আজি পৰ্যন্ত শোণিতপুৰ জিলাত ৪৫ হেজাৰৰো অধিক ব্যক্তিক প্ৰতিষেধক প্ৰদান কৰা হৈছে আৰু আজি পৰ্যন্ত সমগ্ৰ জিলাত প্ৰায় ৩ লাখ ২০ হেজাৰ ব্যক্তিক প্ৰতিষেধক প্ৰদান কৰা হৈছে বুলি উপায়ুক্ত গৰাকীয়ে উল্লেখ কৰে।
আজি জিলা উপায়ুক্তৰ লগত উপস্থিত থাকি বাগিছা সমুহৰ চিকিৎসা পৰিদৰ্শক ডঃ প্ৰদীপ লহকৰে সংবাদ মাধ্যমক অঞ্চলটোৰ প্ৰায় ৪০ খন চাহ বাগিচাত ভেকচিন প্ৰদান সন্তোষজনক বুলি উল্লেখ কৰে। আজিৰ উপায়ুক্তৰ পৰিদৰ্শন কাৰ্যসূচীত অসম চাহ মজদুৰ সংঘ তেজপুৰ শাখাৰ ভাৰপাপ্ত সম্পাদক সুনিল টুটী আৰু এপিজে সমুহ চাহ বাগিচাৰ পৰিচালক সকল উপস্থিত থাকে।
