মাননীয় সম্পাদক মহোদয়,
আমাৰ ৰাজ্যখনৰ ছাত্র সংগঠনসমূহে সামাজিক, সাংস্কৃতিক আৰু শিক্ষাগত উন্নয়নৰ ক্ষেত্ৰত গুৰুত্বপূর্ণ ভূমিকা পালন কৰি আহিছে। শিক্ষাৰ্থীসকলৰ কেৰিয়াৰ গঢ়াত ছাত্র সংগঠনসমূহে উল্লেখযোগ্য ভূমিকা পালন কৰিব পাৰে। শিক্ষাৰ্থীসকলৰ কেৰিয়াৰ নিৰ্বাচনত সহায়ৰ বাবে ছাত্র সংগঠনসমূহে কেৰিয়াৰ পৰামৰ্শদান কেন্দ্ৰ স্থাপন কৰিব পাৰে। ইয়াৰ যোগেদি পৰামৰ্শদাতাই শিক্ষাৰ্থীসকলৰ আগ্ৰহ আৰু সক্ষমতাৰ ভিত্তিত উপযুক্ত কেৰিয়াৰৰ বিষয়ে পৰামৰ্শ প্রদান কৰিব পাৰে। ছাত্র সংগঠনসমূহে সফল পেছাদাৰী, উদ্যোগ বিশেষজ্ঞ, আৰু উদ্যোগীসকলক লৈ আলোচনা চক্ৰ আৰু কৰ্মশালাৰ আয়োজন কৰিব পাৰে। ছাত্র সংগঠনসমূহে শিক্ষাৰ্থীসকলৰ দক্ষতা বিকাশৰ বাবে কম্পিউটাৰ সাক্ষৰতা, ভাষা দক্ষতা (যেনে- ইংৰাজীকে ধৰি বিদেশী ভাষা) তথা অন্যান্য কাৰিকৰী দক্ষতাৰ প্ৰশিক্ষণ আদিত অধিক গুৰুত্ব দিব লাগে যিহেতু কেৱল শৈক্ষিক শিক্ষাই যথেষ্ট নহয়। শিক্ষাৰ্থীসকলৰ আৰ্থিক সমস্যা সমাধানৰ বাবে ছাত্র সংগঠনসমূহে শিক্ষাৰ্থীসকলৰ বাবে বৃত্তি (Scholarship) ব্যৱস্থা আৰু অংশকালীন চাকৰি (Part-Time Job)ৰ সুযোগ লাভ কৰাৰ বাবে চৰকাৰ বা বেচৰকাৰী সংস্থাৰ সৈতে সহযোগিতা কৰিব পাৰে। ছাত্র সংগঠনসমূহে শিক্ষাৰ্থীসকলৰ বাবে ৰাষ্ট্ৰীয় আৰু আন্তঃৰাষ্ট্ৰীয় প্ৰতিষ্ঠানত সুযোগ লাভ কৰাৰ বাট মুকলি কৰিব পাৰে। এই পদক্ষেপসমূহৰ ভিতৰত শিক্ষাৰ্থীসকলক বৃত্তি কাৰ্যসূচী আৰু বিনিময় কাৰ্যসূচীত অংশগ্ৰহণ কৰাত সহায় কৰাটো অন্তৰ্ভুক্ত হ’ব পাৰে। ছাত্র সংগঠনসমূহে বিভিন্ন প্ৰতিযোগিতামূলক পৰীক্ষাৰ প্ৰস্তুতি কেন্দ্ৰ স্থাপন কৰিব পাৰে। যিসকল শিক্ষাৰ্থীয়ে অন্য ৰাজ্য বা দেশত অধ্যয়ন কৰিব খোজে, তেওঁলোকৰ বাবে ছাত্র সংগঠনসমূহে প্ৰয়োজনীয় তথ্য আৰু নেটৱৰ্কিংৰ সুবিধা প্ৰদান কৰিব পাৰে। শিক্ষাৰ্থীৰ কেৰিয়াৰ বিকাশৰ ক্ষেত্ৰত এক কেন্দ্ৰীভূত আৰু লক্ষ্যমুখী পদ্ধতি গ্ৰহণ কৰি ছাত্র সংগঠনসমূহে শিক্ষাৰ্থীসকলৰ ভৱিষ্যৎ উন্নত কৰাত যথেষ্ট অৰিহণা যোগাব পাৰে। ইয়াৰ ফলত অসমৰ সামগ্ৰিক আৰ্থ-সামাজিক প্ৰগতিৰ পথ প্ৰশস্ত হ’ব।
ড° বুলজিৎ বুঢ়াগোহাঁই
কেৰিয়াৰ পৰামৰ্শদাতা তথা মুৰব্বী, যান্ত্রিক অভিযান্ত্রিক বিভাগ,
অসম ডন বস্ক’ বিশ্ববিদ্যালয়
ফোন: ৯৪৩৫১৮৮৬৩০
ই-মেইল: buljit@gmail.com
www.buljit.com
