বিশ্বনাথৰ চেলাইখাতিত পৰম্পৰাগত কাৰ্বি লোকগীত নৃত্য প্ৰশিক্ষণৰ সফল সমাপ্তি
অসম খবৰ , বিশ্বনাথৰ পৰা ৰমেশ চন্দ্ৰ চৰেণ’ৰ ৰিপৰ্ট , ১১ জানুৱাৰী ঃ
বিশ্বনাথ জিলাৰ অসম অৰুণাচল সীমান্তৱৰ্তীৰ চেলাইখাতিত কাৰ্বি জনগোষ্ঠীৰ পৰম্পৰাগত লোকগীত নৃত্যৰ প্ৰশিক্ষণ কালি সফল সমাপ্তি ঘটে ৷ ৰাচিংজা আচং বিশ্বনাথ জিলা সমিতিৰ দ্বাৰা আয়োজিত সভাত কাৰ্বি জনগোষ্ঠীৰ কলা, কৃষ্টি, সংস্কৃতিৰ বিকাশৰ বিশদভাৱে আলোচনা কৰাৰ উপৰিও কাৰ্বি সমাজৰ মাজত হেৰাই যাব ধৰা সংস্কৃতি সমুহ উদ্ধাৰৰ বাবে প্ৰয়াস কৰা সন্দৰ্ভতো আলোকপাত কৰে ৷ কলা , কৃষ্টি আৰু সংস্কৃতিক সংৰক্ষণ , প্ৰচাৰ আৰু প্ৰসাৰৰ ওপৰতো গুৰুত্ব প্ৰদান কৰে সভাখনে ৷ উল্লেখ্য যে কাৰ্বি আংলং স্বায়ত্ত্বশাসিত পৰিষদৰ কাৰ্যবাহী সদস্য ৰূপসিং তেৰনৰ তত্বাৱধানত কাৰ্বি আংলংৰ বাহিৰেও কাৰ্বি অধ্যুষিত অঞ্চল সমুহত কাৰ্বি জনগোষ্ঠীৰ কলা , কৃষ্টি- সংস্কৃতিৰ বিকাশ আৰু সংৰক্ষণ আৰু প্ৰচাৰ , প্ৰসাৰৰ বাবেও চৰকাৰী আচনিভুক্ত কৰি কাৰ্য ৰূপায়ণ কৰাৰ সমান্তৰালকৈ চেলাইখাতিতো সংস্কৃতি বিষয়ক কাম সমুহ কৰাৰ সময়োপযোগী পদক্ষেপ গ্ৰহন কৰে ৷ সেই মৰ্মে সভাত সাংস্কৃতিক বিষয়ক আচনি সমুহৰ কাৰ্য ৰূপায়ণৰ সন্দৰ্ভত সিদ্ধান্ত গ্ৰহন কৰে ৷ শেহতীয়াকৈ ” ৰাচিংজা আচং ” নামৰ সাংস্কৃতিক সংগঠন বিশ্বনাথ জিলা সমিতিখন গঠনেৰে কাৰ্য ৰূপায়ণৰ প্ৰথম পদক্ষেপ স্বৰূপ ৫ জনীয়া অভিজ্ঞতাপ্ৰাপ্ত মহিলা সকলৰ দ্বাৰা কাৰ্বি জনগোষ্ঠীৰ পৰম্পৰাগত লোকগীত আৰু নৃত্যৰ প্ৰশিক্ষণৰ ব্যৱস্থা গ্ৰহন কৰিছে ৷ বিশেষকৈ আগন্তুক চমংকান (দহা , শ্ৰাদ্ধৰ পৰ্ব )ৰ উপলক্ষে কাৰ্বি সমাজৰ পৰম্পৰাগত গীত , লোক সংস্কৃতি দিশটো সংৰক্ষণ সংবৰ্ধন আৰু প্ৰসাৰৰ বাবে বিভিন্ন কাৰ্বি অধ্যুষিত অঞ্চল সমুহত প্ৰশিক্ষণৰ ব্যৱস্থা গ্ৰহন কৰা বুলি জানিব পৰা গৈছে ৷ কালি ১৫ দিনীয়া প্ৰশিক্ষণৰ অন্ত পৰা ৰাচিংজা আচং বিশ্বনাথ জিলা সমিতিৰ সভাপতি সোমেশ্বৰী চেংনাৰপীৰ সভাপতিত্বত আৰু সম্পাদিকা পুৰ্ণিমা তিমুংপীৰ আত ধৰা সভাত প্ৰশিক্ষক সকলৰ উপৰিও আমন্ত্ৰিত অতিথিৰ লগতে চেলাইখাতিৰ ভাস্কৰ্যশিল্পী গবিন ৰংফাৰ সম্বৰ্ধনা জনাই ৷ বিশিষ্ট অতিথি হিচা্বে অংশগ্ৰহণ কৰে বিশ্বনাথ জিলা কাৰ্বি ছাত্ৰ সন্থাৰ উপসভাপতি দিপচন চেংনাৰ , জিলা কাৰ্যনিৰ্বাহক সদস্য ৰঞ্জন কিলিং , কাৰ্বি সাহিত্য সভাৰ চেলাইখাতি আঞ্চলিক সমিতিৰ কোষাধ্যক্ষ ৰাজু ৰংহাঙকে প্ৰমুখ্য কৰি কেইগৰাকী বক্তাই জনগোষ্ঠীটোৰ শৈক্ষিক , আৰ্থসামাজিক আৰু সাংস্কৃতিক দিশ সমুহৰ ওপৰত বক্তব্য ৰাখে ৷সভাত কাৰ্বি ছাত্ৰ সন্থাৰ চেলাইখাতি আঞ্চলিক সমিতিৰ বিষয়ববীয়া সকল প্ৰমুখ্যে ৰাচিংজা আচং বিশ্বনাথ জিলা সমিতিৰ কৰ্মকৰ্তা সকলৰ উপৰিও চেলাইখাতিৰ বহু সংখ্যক , মহিলা , যুৱতী সকল উপস্থিত থাকে ৷ অনুষ্ঠানত নাহৰ ৰংহাংপী আৰু হমচিৰা তেৰাংপীয়ে সম্ভাষণমুলক গীত পৰিবেশন কৰে ৷ পৰিশেষত শলাগ শৰাই আগবঢ়াই ৰাচিংজা আচং বিশ্বনাথ জিলা সমিতিৰ সাংগঠনিক সম্পাদিকা ৰূপালী ইংতিপীয়ে ৷
