- পুণঃ জব্দ অবৈধ কাঠ ফলা মিল সহ এক গাড়ী মূল্যবান কাঠ
♦কৃষ্ণাইৰ পৰা কন্দৰ্প কুমাৰ দেৱ নাথঃ গোৱালপাৰা জিলাৰ কৃষ্ণাই আঞ্চলিক বন বিভাগে অবৈধ কাঠ ব্যৱসায়ীৰ বিৰুদ্ধে অভিযান অব্যাহত ৰাখিছে৷
আজিও বন বিষয়া শিৱাণী দলেৰ নেতৃত্বত পুৱাৰে পৰা চলে তীব্ৰ অভিযান৷ এই অভিযান কালত বন ৰক্ষীৰ দলটোৱে দাবলিৰ পৰা এটা অবৈধ কাঠ ফলা মিল উচ্ছেদ কৰাৰ বিপৰীতে বলবলাৰ হাতীগাঁৱৰ পৰা গাড়ীসহ জব্দ কৰে প্ৰায় পঞ্চাশ হেজাৰ টকা মূল্যৰ ফলা কাঠ৷
বন বিভাগে জব্দ কৰা গাড়ী খনৰ নম্বৰ হৈছে এ এছ ১৫ চি ৫৮৩৮৷ উল্লেখ্য যে শিৱাণী দলেই কৃষ্ণাই আঞ্চলিক বন বিভাগত বন বিষয়াৰ দায়িত্ব গ্ৰহণ কৰাৰ পিছৰে পৰা বিষয়া গৰাকীয়ে চোৰাং কাঠ ব্যৱসায়ীৰ বিৰুদ্ধে ধাৰবাহিক ভাৱে অভিযান চলাই আহিছে৷ এই অভিযান কালত জব্দ হৈছে বহু অবৈধ কাঠ ফলা মিল তথা মূল্যবান কাঠৰ কুণ্ডা৷
এই সন্দৰ্ভত বন বিষয়া গৰাকীৰ পৰা জানিব বিচৰাত তেওঁ কয়-কৃষ্ণাই আঞ্চলিক বন বিভাগে চৰকাৰী বন্যভূমিত চোৰাং বেপাৰীয়ে অবৈধ ভাৱে চলাই থকা কাঠ ব্যৱসায়ৰ বিৰুদ্ধে অভিযান অব্যাহত ৰাখিব৷ এই ক্ষেত্ৰত বন বিষয়া শিৱাণী দলেই সাধাৰণ ৰাইজৰ পৰা সহযোগিতা কামনা কৰিছে৷
