বিশ্বনাথতো শুভাৰম্ভ অমৃত বৃক্ষ আন্দোলন কাৰ্যসূচী
অভিযান সফল কৰিবলৈ সকলোকে আহ্বান জনালে বিধায়ক-জিলা আয়ুক্তই
অসম খবৰ বিশ্বনাথ চাৰিআলি,১ আগষ্ট :
সেউজ আৱৰণ বৃদ্ধি আৰু পৰিৱেশ সংৰক্ষণৰ উদ্দেশ্য আগত ৰাখি ব্যৱসায়িক গছপুলি ৰোপণৰ বাবে ৰাজ্য চৰকাৰে গ্ৰহণ কৰা অমৃত বৃক্ষ আন্দোলন কাৰ্যসূচী আজি বিশ্বনাথতো শুভাৰম্ভ কৰা হয়।
বিশ্বনাথ জিলা আয়ুক্ত কাৰ্যালয়ৰ চৌহদত পুৱা ১০.৩০ বজাৰ পৰা শুভাৰম্ভ হোৱা অমৃত বৃক্ষ আন্দোলনৰ এই বিশেষ কাৰ্যসুচীত বিশ্বনাথ বিধানসভা সমষ্টিৰ বিধায়ক প্ৰমোদ বৰঠাকুৰ, জিলা আয়ুক্ত ডাঃ নেহা যাদৱ, বিশ্বনাথ জিলাৰ আৰক্ষী অধীক্ষক শুভাশীষ বৰুৱাৰ লগতে জিলা প্ৰশাসনৰ বিষয়া কৰ্মচাৰীসকল আৰু বিশ্বনাথৰ সকলো বিভাগৰ মুৰব্বী বিষয়াসকলৰ উপস্থিতিত অনুষ্ঠিত হয় শুভাৰম্ভণি অনুষ্ঠান।
বিশ্বনাথৰ অতিৰিক্ত জিলা আয়ুক্ত ধ্ৰুৱজ্যোতি দাসে সমগ্ৰ কাৰ্যসূচীটোৰ বিষয়ে আলোকপাত কৰা শুভাৰম্ভ অনুষ্ঠানটিত নাতিদীৰ্ঘ ভাষণ প্ৰদান কৰি বিশ্বনাথৰ বিধায়ক প্ৰমোদ বৰঠাকুৰ, জিলা আয়ুক্ত ডাঃ নেহা যাদৱ, পূৱ শোণিতপুৰ বন সংমণ্ডলৰ বন প্ৰাধিকাৰী বিশ্বজ্যোতি দাস আদিয়ে অমৃত বৃক্ষ আন্দোলনৰ এক গুৰুত্বপূৰ্ণ অভিযান বুলি মন্তব্য কৰে। এই অভিযানে ভাৰতৰ সেউজ আৱৰণ বৃদ্ধি আৰু পৰিৱেশ সংৰক্ষণৰ ক্ষেত্ৰত গুৰুত্বপূৰ্ণ ভূমিকা ল’ব পাৰে বুলি প্ৰকাশ কৰাৰ লগতে বিশ্বনাথতো এই বিশেষ অভিযান সফল কৰিবলৈ সকলোকে ঐক্যবদ্ধভাৱে কাম কৰিবলৈও আহ্বান জনায়। অনুষ্ঠানটিত উপস্থিত থকা বিশিষ্ট ব্যক্তি সকলে আজি বিশ্বনাথৰ কাছাৰী ময়দান চৌহদত দহটা মূল্যবান গছৰ পুলি ৰোপণ কৰি সমগ্ৰ কাৰ্যসূচীৰ পাতনি মেলে। আজিৰ অনুষ্ঠানটিত অতিৰিক্ত জিলা আয়ুক্তসকল ৰাকেশ ডেকা, হৃদয় কুমাৰ দাস, সহকাৰী আয়ুক্তসকল পুষ্পাংকৰ পাতিৰ, সৃষ্টি কলিতা, বিচিত্ৰা দাস, সমাজকৰ্মী দিগন্ত ঘাটোৱাৰ, বিভিন্ন বিভাগৰ মুৰব্বী, বন বিভাগৰ বিষয়া তথা জিলা প্ৰশাসনৰ বিষয়া কৰ্মচাৰীসকলেও অংশ গ্ৰহণ কৰে।
উল্লেখ্য যে অমৃত বৃক্ষ আন্দোলন কাৰ্যসূচীৰ অধীনত নিৰ্দ্ধাৰিত সময়ৰ ভিতৰত প্ৰায় ষাঠিটা প্ৰজাতিৰ মুঠ ৯ লাখ মূল্যবান গছপুলি ৰোপণৰ লক্ষ্য নিৰ্ধাৰণ কৰা হৈছে। জিলাখনৰ বিভিন্ন বিভাগৰ লগতে বিভিন্ন সংগঠন, গোট আদিয়ে এই বিশেষ কাৰ্যসুচীত অংশগ্ৰহণ কৰিব বুলি জানিব পৰা গৈছে।
