কলা শাখাত তৃতীয় স্হানপ্ৰাপ্ত নিলয় কুৰ্মীক বিশ্বনাথ জিলা প্ৰশাসনৰ অভিনন্দন
মাচ্ কমিউনিকেশ্যন অধ্যয়ন কৰাৰ প্ৰৱল ইচ্ছা কৃতী ছাত্ৰ গৰাকীৰ_
বিশ্বনাথ , ২৯ জুন:সদ্যঘোষিত উচ্চতৰ মাধ্যমিক চূড়ান্ত পৰীক্ষাৰ ফলাফলত কলা শাখাত অসমৰ ভিতৰতে তৃতীয় স্থান লাভ কৰি বিশ্বনাথ জিলালৈ গৌৰৱ কঢ়িয়াই অনা বিশ্বনাথ জিলাৰ মেধাৱী ছাত্ৰ নিলয় কুৰ্মীক আজি বিশ্বনাথ জিলা প্ৰশাসনে অভিনন্দন জ্ঞাপন কৰে। বিশ্বনাথ জিলাৰ সহকাৰী আয়ুক্তদ্বয় অনন্যা লহকৰ আৰু কংকনা শইকীয়াই আজি বিয়লি কৃতী ছাত্ৰ নিলয় কুৰ্মীক বিশ্বনাথ চাৰিআলিৰ সূৰ্য্যপুৰ বালিপুখুৰীস্হিত বাসগৃহত গৈ শৰাই আৰু গামোচাৰে বিশ্বনাথ জিলা প্ৰশাসনৰ তৰফৰ পৰা অভিনন্দন জ্ঞাপন কৰে।উল্লেখ্য যে, নগাৱঁৰ ৰামানুজন জুনিয়ৰ কলেজৰ পৰা পৰীক্ষাত অৱতীৰ্ণ হৈ উচ্চতৰ মাধ্যমিক শিক্ষান্ত পৰীক্ষাত সৰ্বমুঠ ৪৮৩ নম্বৰেৰে অসমৰ ভিতৰত তৃতীয় স্থান (কলা শাখা) লাভ কৰি গৌৰৱ কঢ়িয়াই আনিবলৈ সক্ষম হয়। বিশ্বনাথ জিলাক গৌৰৱান্বিত কৰা মেধাৱী ছাত্ৰ নিলয়ে ভৱিষ্যতে মাচ্ কমিউনিকেশ্যন অধ্যয়ন কৰাৰ প্ৰৱল ইচ্ছা মনতে পুহি ৰাখিছে আৰু সদ্যহতে ইংৰাজী বিষয়ত মেজৰ লৈ অধ্যয়ন কৰিব বুলি জানিবলৈ দিছে। বিশ্বনাথ জিলাৰ সূৰ্য্যপুৰ, বালিপুখুৰীস্হিত নিৱাসী নৱজ্যোতি কুৰ্মী আৰু ৰুমী কুৰ্মীৰ পুত্ৰ তথা মেধাৱী ছাত্ৰ
নিলয়ৰ এই সফলতাত জিলাবাসী বাৰুকৈয়ে উৎফুল্লিত হৈছে আৰু নিলয়ক আন্তৰিক অভিনন্দন জ্ঞাপন কৰাৰ লগতে ভৱিষ্যতে যেন তেওঁ শৈক্ষিক ক্ষেত্ৰখনত সফলতাৰে আগুৱাই যাব পাৰে তাৰেই কামনা কৰিছে।
