পথ দুৰ্ঘটনাত নলবাৰী মহাবিদ্যালয়ৰ অধ্যাপক কন্দৰ্প কলিতাৰ শোকাবহ মৃত্যু

পথ দুৰ্ঘটনাত নলবাৰী মহাবিদ্যালয়ৰ অধ্যাপক কন্দৰ্প কলিতাৰ শোকাবহ মৃত্যু

এক হৃদয়বিদাৰক ঘটনা৷ নলবাৰী মহাবিদ্যালয়ৰ উদ্ভিদ বিজ্ঞান বিভাগৰ অধ্যাপক কন্দৰ্প কলিতাৰ পথ দুৰ্ঘটনাত মৃত্যু হয়৷

কালি নিশা ৩১ নম্বৰ ৰাষ্ট্ৰীয় ঘাইপথত ঘগ্ৰাপাৰৰ ওচৰত ট্ৰাকেৰে হোৱা মুখামুখি সংঘৰ্ষত অধ্যাপক কলিতাৰ থিতাতে মৃত্যু হয়৷জানিব পৰা মতে ৰঙিয়াৰ স্বস্তি হস্পিতালত কোনো আত্মীয়ৰ অসুখৰ খবৰ লৈ নিশা প্ৰায় এঘাৰ মান বজাত নলবাৰী চহৰৰ পাৰ্শৱৰ্তী জাপাৰকুছি মইনপুৰৰ ঘৰলৈ অকলে বাইকেৰে আহি থকা অৱস্থাতে দুৰ্ঘটনাটো সংঘটিত হয়৷ ট্ৰাকৰ সৈতে হোৱা সংঘৰ্ষত অধ্যাপক কলিতাৰ থিতাতে মৃত্যু হয়৷

ঘগ্ৰাপাৰৰ ওচৰৰ বৰাজোলৰ এটা দৰিদ্ৰ পৰিয়ালৰ পৰা আহি মেধাৰ বলত নলবাৰী মহাবিদ্যালয়ত অধ্যাপক পদত কৰ্মৰত কলিতাই জাপাৰকুছিৰ মইনপুৰত পৰিয়ালৰ সৈতে বসবাস কৰিছিল৷ মৃত্যুৰ সময়ত পত্নী আৰু দুই কণমানি কন্যা সন্তান সহ অসংখ্য গুণমুগ্ধ ইহসংসাৰত এৰি থৈ যায়৷

অতি নিৰ্জু, অমায়িক অধ্যাপক গৰাকীৰ আকস্মিক মৃত্যুৰ বাতৰিয়ে নলবাৰী কলেজৰ অধ্যাপক অধ্যাপিকাৰ তথা নলবাৰীৰ লগতে জন্ম গাঁও বৰাজোলত শোকৰ ছাঁ পেলাইছে৷

দুদিন পূৰ্বে নলবাৰী মহাবিদ্যালয়ৰ পৰা ছাত্ৰছাত্ৰীৰ লগত শিক্ষামূলক ভ্ৰমণৰ বাবে মানসলৈ গৈছিল৷ ফূৰ্তিবাজ শিক্ষক গৰাকীয়ে ভ্ৰমণৰ সময়ত ছাত্ৰছাত্ৰীৰ সৈতে আনন্দ উল্লাস কৰিছিল৷ এনে এগৰাকী ছাৰৰ অকাল মৃত্যুত মৰ্মাহত হোৱা ছাত্ৰছাত্ৰী আহি নলবাৰী শ্বহীদ মুকুন্দ কাকতি চিকিৎসালয়ৰ মৰ্গৰ চৌহদত ভিৰ কৰি কান্দোনত ভাঙি পৰিছে৷

নলবাৰীৰ পৰা ফইজুল হক চৌধুৰীৰ প্ৰতিবেদন