■ ৰঙাপৰাত নিৰ্মাণাধীন উৰণীয়া সেতু মালতি ওৰাং(মাংৰি মেম)ৰ নামেৰে নামাকৰণ কৰিবলৈ দাবী জনায় অসম চাহ জনজাতি ছাত্ৰ সন্থা চমুকৈ আটছাই কালি অসম চৰকাৰৰ শ্ৰম আৰু কল্যাণ মন্ত্ৰী সঞ্জয় কিষাণক স্মাৰক পত্ৰ প্ৰদান কৰে।তেজপুৰ আৱৰ্ত ভৱনত ৰঙাপৰা সমষ্টিৰ বিধায়ক কৃষ্ণ কমল তাতীৰ উপস্থিতিত আটছাৰ তেজপুৰ শাখাৰ ভাৰপাপ্ত সভাপতি নমেশ ওৰাং আৰু সম্পাদক পংকজ নায়কে মন্ত্ৰী সঞ্জয় কিষাণক বিভিন্ন দাবী সম্বলিত এখন স্মাৰক পত্ৰ প্ৰদান কৰে।
ভাৰপাপ্ত সভাপতি নমেশ ওৰাংয়ে নিৰ্মাণাধীন উৰণীয়া সেতু মালতি ওৰাং(মাংৰি মেম)ৰ নামেৰে নামাকৰণ, ৰঙাপৰা মহাবিদ্যালয়ত চাহ জনগোষ্ঠীৰ ছাত্ৰ ছাত্ৰীৰ বাবে অতি শীঘ্ৰে আৱাসিক গৃহ নিৰ্মাণ, তেজপুৰ শাখাৰ অন্তৰ্গত বাগিচা সমুহত নিৰ্মাণ হৈ থকা হাইস্কুল সমূহত চাহ জনগোষ্ঠীৰ ছাত্র ছাত্ৰীক তৃতীয় আৰু চতুৰ্থ বিভাগত সংস্থাপন আৰু আই টি আই কলেজত স্থানীয় চাহ জনগোষ্ঠীৰ ছাত্র ছাত্ৰীক তৃতীয় আৰু চতুৰ্থ বিভাগত সংস্থাপন দিবলৈ দাবী জনাই মন্ত্ৰী গৰাকীক স্মাৰক পত্ৰ প্ৰদান কৰা বুলি সংবাদ মাধ্যমক অৱগত কৰে।
সাম্প্ৰতিক সময়ত সমগ্ৰ বিশ্বত আতংক ৰূপে ধাৰণ কৰা কৰণা মহামাৰীয়ে ৰাজ্যৰ সমুহ চাহ বাগিচাত এক বিকট ৰূপ ধাৰণ কৰা হেতুকে উক্ত দাবী সমুহৰ ওপৰত দৃষ্টি ৰাখি সমগ্ৰ চাহ জনগোষ্ঠীৰ সামগ্ৰিক উন্নয়ন আৰু উত্তৰণৰ বাবে কৰিবলগীয়া কিছু সমস্যাৰ সমাধান কৰিবলৈ তেওঁ চৰকাৰক আহ্বান জনায়।
