■ প্ৰতিবাদী শিল্পীক বিনাচৰ্তে মুক্তিৰ দাবী মনোজ ধানোৱাৰৰ
■’ভৰলুমুখৰ গছ কটাৰ সিদ্ধান্ত প্ৰকৃতিৰ ওপৰত আক্ৰমণ ‘- আপ
গুৱাহাটী, ১৩ নৱেম্বৰ – চিত্ৰশিল্পী মাৰ্শ্বেল বৰুৱা আৰু অংকুমান বৰদলৈক বিনাচৰ্তে মুক্তিৰ দাবী আম আদমী পাৰ্টিৰ ৰাজ্যিক সভাপতি মনোজ ধানোৱাৰৰ। আজি এক প্ৰেছ বিজ্ঞপ্তি যোগে আপৰ নেতাগৰাকীয়ে ৰাজ্য চৰকাৰৰ স্বৈৰতান্ত্ৰিক পদক্ষেপৰ বিৰোধিতা কৰি কয়, ” গুৱাহাটী মহানগৰীত উৰণ সেতু নিৰ্মাণৰ নামত চৰকাৰে পাৰিপাৰ্শ্বিকতাৰ ওপৰত আক্ৰমণ চলাইছে। ভৰলুমুখত শত বছৰ গৰকা বহুসংখ্যক গছ কটাৰ চৰকাৰী সিদ্ধান্তৰ বিৰুদ্ধে ৰাজ্যৰ বিভিন্ন সংগঠন তথা সচেতন ৰাইজে প্ৰতিবাদ কৰিছে। চিত্ৰশিল্পী মাৰ্শ্বেল বৰুৱা আৰু জাতীয় যুৱ বাহিনীৰ প্ৰচাৰ সম্পাদক অংকুমান বৰদলৈয়ে ছবি আঁকি প্ৰতিবাদ সাব্যস্ত কৰিছে। পৰিবেশ আৰু প্ৰকৃতিৰ বিৰুদ্ধে চৰকাৰে কৰা অন্যায়ৰ প্ৰতিবাদ কৰিছে শিল্পীয়ে। ৰং- তুলিকাৰে কৰা এই প্ৰতিবাদ গণতান্ত্ৰিক আন্দোলনৰ এটা অংশ। আম আদমী পাৰ্টিয়ে শিল্পী মাৰ্শ্বেল বৰুৱা আৰু অংকুমান বৰদলৈক অবিলম্বে মুক্তি দিবলৈ দাবী জনাইছোঁ। ” প্ৰেছ বিজ্ঞপ্তিটোত আপৰ ৰাজ্যিক সভাপতি মনোজ ধানোৱাৰে কয়, ” চৰকাৰে উন্নয়নৰ নামত গুৱাহাটী মহানগৰীত উৰণ সেতু নিৰ্মাণত সৰ্বাধিক গুৰুত্ব আৰোপ কৰিছে । জলবায়ু পৰিৱৰ্তনৰ ভয়াবহ পৰিণতি আৰু গোলকীয় উঞ্চতা বৃদ্ধিৰ বিষয়টো মুঠেও গুৰুত্ব সহকাৰে লোৱা নাই। কেইদিনমান পূৰ্বে দীঘলীপুখুৰীৰ গছ কটাৰ বিৰুদ্ধেও প্ৰতিবাদ হৈছিল। জনসাধাৰণৰ স্বতঃস্ফুৰ্ত প্ৰতিবাদৰ পিচত দীঘলীপুখুৰীৰ পাৰৰ গছ কটা বন্ধ হয়। আমি ভৰলুমুখৰ গছ কটাৰ সিদ্ধান্তও প্ৰত্যাহাৰ কৰিবলৈ দাবী জনাইছোঁ। মহানগৰীৰ পাৰিপাৰ্শ্বিকতা বিনষ্টকাৰী যিকোনো পদক্ষেপ গ্ৰহণৰ পৰা চৰকাৰক বিৰত থাকিবলৈ আহ্বান জনাইছোঁ। “
