গোৱালপাৰাৰ লক্ষীপুৰত বন্যহস্তীৰ কৰুণ অৱস্থাঃচৈবাৰীৰ দ পুখুৰীত ওৰে নিশা আৱদ্ধ ছয়টা বনৰীয়া হাতী
মানুহ আৰু বন্যহস্তীৰ সংঘাটে তীব্ৰৰূপ ধাৰণ কৰা গোৱালপাৰা জিলাৰ লক্ষীপুৰত আজি দেখা গ’ল এজাক বন্যহস্তীৰ কৰুণ অৱস্থা ৷
লক্ষীপুৰৰ চৈবাৰী তৈল খেজুৰ বাগানৰ দ পুখুৰীত যোৱা নিশা পানী খাবলৈ নামি আজি দুপৰীয়ালৈ পুখুৰীটোতে আৱদ্ধ হৈ থাকিল ছয়টাকৈ বন্যহস্তী ৷
উল্লেখ্য যে কালিও এই পুখুৰীটোত আৱদ্ধ হৈ পৰিছিল পাঁচটাকৈ বন্যহস্তী ৷ কালি বন বিভাগে অশেষ কষ্ট কৰি বনৰীয়া হাতী কেইটা উদ্ধাৰ কৰে যদিও যোৱা নিশা পুণৰ আন ছয়টা হাতী পানী খাবলৈ নামি আৱদ্ধ হয় দ পুখুৰীটোত ৷
পুখুৰীটোৰ পাৰ বহু ওখ হোৱাৰ বাবে পানীৰ পৰা উঠি অহাৰ কোনো পথ নেপাই গোটেই নিশা প্ৰাণৰ মমতাত চিঞৰি থাকে হাতীকেইটা ৷
অৱশেষত আজি দুপৰীয়া বন বিভাগে জেচিবি, এক্সেভেলেটৰেৰে পুখুৰীৰটোৰ পাৰ খান্দি হাতী কেইটাক উঠি অহাৰ ব্যৱস্থা কৰি দিয়ে ৷ বন বিভাগৰ এনে তৎপৰতাত একাংশ ৰাইজে সন্তোষ প্ৰকাশ কৰিছে যদিও আন একাংশই সঠিক মতে কৰ্তব্য সম্পাদন নকৰাৰ অভিযোগ তুলিছে বন বিভাগটোৰ বিৰুদ্ধে ৷
ৰাইজে অতি শীঘ্ৰে চৈবাৰী তৈল খেজুৰ বাগানৰ দ পুখুৰী কেইটা পুতি পেলোৱাৰ লগতে বন্যহস্তীৰ সমস্যাটো বিজ্ঞান সন্মত ভাৱে সমাধান কৰিবলৈ বন বিভাগৰ ওচৰত দাবী জনাইছে ৷
কৃষ্ণাইৰ পৰা কন্দৰ্প কুমাৰ দেৱ নাথ
