গোৱালপাৰা জিলাৰ কৃষ্ণাই মাদ্ৰাছা উচ্চতৰ মাধ্যমিক বিদ্যালয়ৰ অধ্যক্ষ মইনুল হকৰ যোৱা নিশা গুৱাহাটীৰ এখন চিকিৎসালয়ত পৰলোক প্ৰাপ্তি ঘটে ৷
মৃত্যুৰ সময়ত অধ্যক্ষ মইনুল হকৰ বয়স আছিল ৫৫ বছৰ ৷ জানিব পৰা মতে, উচ্চ ৰক্তচাপ জনিত ৰোগত গুৰুতৰ ভাৱে আক্ৰান্ত অধ্যক্ষ হকক যোৱা ৯ ডিচেম্বৰৰ নিশা জিএনআৰচিত ভৰ্তি কৰোৱা হৈছিল ৷ আইচিইউত চিকিৎসাধীন হৈ থকা মইনুল হকক অৱশেষত যোৱা নিশা চিকিৎসকে মৃত ঘোষণা কৰে ৷
আজি দুপৰীয়া তেওঁৰ নশ্বৰ দেহ কৃষ্ণাই পাইকান ২য় খণ্ডৰ আৰিমাৰাস্থ নিজা বাসভৱনলৈ লৈ অহা হয় ৷ ইয়াৰ পিছত অধ্যক্ষ হকৰ প্ৰতি অন্তিম শ্ৰদ্ধাঞ্জলি জনাবলৈ তেওঁৰ মৃতদেহ লৈ যোৱা হয় কৃষ্ণাই মাদ্ৰাছা উচ্চতৰ মাধ্যমিক বিদ্যালয় চৌহদলৈ ৷
উল্লেখ্য যে প্ৰয়াত মইনুল হক এই শিক্ষানুষ্ঠানতে শৈক্ষিক জীৱনৰ পাতনি মেলি অৱশেষত এই বিদ্যালয়তখনতে শিক্ষক হিচাপে নিযুক্তি লাভ কৰে । পৰৱৰ্তী সময়ত তেওঁ অধ্যক্ষ আসনলৈ পদোন্নতি লাভ কৰিবলৈ সক্ষম হয় ৷
অতি ভদ্ৰ আৰু অমায়িক স্বভাৱৰ মইনুল হকে এটা সময়ত হাব্ৰাঘাট মহাবিদ্যালয়,কৃষ্ণাইৰ ছাত্ৰ একতা সভাৰ সাধাৰণ সম্পাদক হিচাপে নিৰ্বাচিত হোৱাৰ বিপৰীতে কৃষ্ণাই যুৱ ছাত্ৰ কল্যাণ পৰিষদৰো সক্ৰিয় সদস্য আছিল ।
মৃত্যুৰ সময়ত অধ্যক্ষ মইনুল হকে পত্নীসহ তিনিপুত্ৰক ইহ সংসাৰত এৰি থৈ য়ায় ৷ তেওঁৰ মৃত্যুত কৃষ্ণাই অঞ্চলত গভীৰ শোকৰ ছাঁ পৰে ৷ আজি আবেলি ১:৩০ বজাত সহস্ৰাধিক গুণমুগ্ধৰ উপস্থিতিত আৰিমাৰাৰ সমূহীয়া গড়স্থানত মইনুল হকৰ জানাজা সম্পন্ন কৰা হয় ৷
