■ টংলাৰ পৰা চিন্ময় ডেকাঃ সৎ পথেৰে, সৎ চিন্তাৰে আৰু সৎ দিশেৰে সাধনাত ব্ৰতী হ’লে এগৰাকী সফল ব্যক্তি আৰু সুনাগৰিক হ’ব পাৰি।
আজি বিয়লি ৩ বজাত টংলা প্ৰেছ ক্লাবৰ প্ৰাংগণত সংবাদসেৱী পৰিয়ালৰ ৪গৰাকী কৃতী বিদ্যাৰ্থীক অভিনন্দন জনোৱা অনুষ্ঠানত অংশগ্ৰহণ কৰি ওদালগুৰি জিলা সাহিত্য সভাৰ সম্পাদক দিবাকৰ বৰাই এইদৰে কয়।
ওদালগুৰি জিলা সাহিত্য সভাৰ প্ৰাক্তন সভাপতি গৌৰী শংকৰ দাস, টংলা প্ৰেছ ক্লাবৰ প্ৰাক্তন সভাপতি উজ্জ্বল কুমাৰ দাস আৰু সংবাদসেৱী অমৰজিৎ ৰাভাই ছাত্ৰ- ছাত্ৰীসকলক উদ্দেশ্যি শুভেচ্ছামূলক ভাষণ দিয়ে।
বাতৰি কাকত বিলনিয়াৰ কৃষ্ণ ৰয়ৰ হাইস্কুল শিক্ষান্ত পৰীক্ষাত কৃতিত্বৰে উত্তীৰ্ণ কন্যা ৰশ্মি ৰয়, সাংবাদিক উজ্জ্বল কুমাৰ দাসৰ হাইস্কুল শিক্ষান্ত পৰীক্ষাত কৃতিত্বৰে উত্তীৰ্ণ কন্যা কয়েল দাস, সংবাদ সেৱী চিন্ময় ডেকাৰ উচ্চতৰ মাধ্যমিক চূড়ান্ত পৰীক্ষাৰ বিজ্ঞান শাখাত
কৃতিত্বৰে উত্তীৰ্ণ ভগ্নী দীপান্বিতা ডেকা আৰু প্ৰয়াত সংবাদ সেৱী ধনেশ্বৰ ৰাভাৰ উচ্চতৰ মাধ্যমিক চুড়ান্ত পৰীক্ষাৰ বিজ্ঞান শাখাত কৃতিত্বৰে উত্তীৰ্ণ পুত্ৰ বিবেক ৰাভাক ফুলাম গামোচা, কলম, অভিনন্দন পত্ৰৰে অভিনন্দন জনোৱা হয়।
ছাত্ৰ-ছাত্ৰীসকলে ৰবীন্দ্ৰ সংগীত, বিষ্ণু ৰাভা সংগীত পৰিবেশন কৰা লগতে অনুভৱ ব্যক্ত কৰে। টংলা প্ৰেছ ক্লাবৰ সভাপতি ফটিক নন্দন ৰাভাৰ সঞ্চালনাত অনুষ্ঠিত সভাত সম্পাদক অৰূপ বড়োই শলাগ জ্ঞাপন কৰা লগতে অনুষ্ঠানৰ আঁত ধৰে।
উক্ত অনুষ্ঠানত টংলা প্ৰেছ ক্লাবৰ উপ সভাপতি দিগন্ত কুমাৰ শৰ্মা, হকাৰ কৃষ্ণ ৰয় প্ৰমুখ্যে সদস্যসকল উপস্থিত থাকে।
