- অসমীয়া ভাষা-সংস্কৃতি বিজেপিয়ে নিঃশেষ কৰিবলৈ অপচেষ্টা চলাইছেঃ ৰাজেশ শৰ্মা
- ‘কা’ বাতিলকৰণৰ বাবে মাত মাতি যাব আম আদমি পাৰ্টীয়ে
গুৱাহাটীঃ অসম তথা উত্তৰ-পূৰ্বাঞ্চলৰ পৃথক পৰিস্থিতিৰ প্ৰতি কোনো গুৰুত্ব প্ৰদান নকৰি কেন্দ্ৰৰ নৰেন্দ্ৰ মোডী চৰকাৰে ৰাজনৈতিক উদ্দেশ্যৰে নাগৰিকত্ব সংশোধনী আইন, ২০১৯ৰ বিধি বলবৎ কৰা কাৰ্যক আম আদমি পাৰ্টীয়ে তীব্ৰ ভাষাৰে গৰিহণা দিয়ে। অসমৰ জনতাৰ তীব্ৰ বিৰোধিতাৰ পাছতো অসমত ‘কা’ বলবৎ কৰাত তৎক্ষাণিক প্ৰতিক্ৰিয়া প্ৰকাশ কৰি দলৰ ৰাজ্যিক সভাপতি ডা৹ ভবেন চৌধুৰীয়ে কয় যে আজিৰ দিনটো অসমৰ বাবে এটা ক’লা দিন হিচাপে ইতিহাসত চিহ্নিত হৈ ৰ’ব। ১৮২৬ চনৰ ২৪ ফেব্ৰুৱাৰীৰ দিনটো যেনেকৈ অসমীয়াৰ বাবে এটা ক’লা দিন আছিল আৰু ইয়াৰ বাবে বদন বৰফুকনক আজিও দেশদ্ৰোহী বুলি ঘৃণা কৰে, থিক একেদৰে ২০২৪ চনৰ ১১ মাৰ্চৰ দিনটো ক’লা দিন হিচাপে মনত ৰাখিব। অসম-অসমীয়াৰ জাতীয় জীৱনলৈ সংকট কঢ়িয়াই এই সাম্প্ৰদায়িক ‘কা’ অসমৰ ওপৰত জাপি দিয়াৰ বাবে ভাৰতীয় জনতা পাৰ্টীক ভৱিষ্যত প্ৰজন্মই জাতিধ্বংসী বদন হিচাপে অভিহিত কৰিব।
আম আদমি পাৰ্টীৰ উত্তৰ পূৰ্বাঞ্চলৰ ৰাষ্ট্ৰীয় তত্ত্বাৱধায়ক ৰাজেশ শৰ্মায়ো এই সন্দৰ্ভত টুইটাৰযোগে নিজৰ প্ৰতিক্ৰিয়া প্ৰকাশ কৰি কয় যে উত্তৰ পূৰ্বাঞ্চলৰ জনতাৰ ইচ্ছাৰ বিৰুদ্ধে গৈ ‘কা’ জাপি দিয়া কাৰ্য কোনো কাৰণতে গ্ৰহণযোগ্য নহয়। এই অঞ্চলৰ খিলঞ্জীয়া জাতি-জনগোষ্ঠীৰ ভাষা-সংস্কৃতি মোডী চৰকাৰে ধ্বংস কৰিবলৈ অপচেষ্টা কৰা বুলি তেওঁ অভিযোগ উত্থাপন কৰি তেওঁ লগতে কয় যে এই অঞ্চলৰ থলুৱা লোকসকলকে বসবাস কৰিবলৈ মাটি-ভেটি দিব নোৱাৰা বিজেপি চৰকাৰে বাংলাদেশী আৰু পাকিস্তানীক নাগৰিকত্ব দিবলৈ ওলাইছে। লাখ লাখ নিবনুৱা যুৱক-যুৱতীক সংস্থাপন দিব নোৱাৰা বিজেপি চৰকাৰে বিদেশৰ পৰা মানুহ আনি সংস্থাপিত কৰিবলৈ বিচাৰিছে।
