নলবাৰীৰ প্ৰাক্তন বিধায়ক মদন কলিতাৰ মৃত্যু

নলবাৰীৰ প্ৰাক্তন বিধায়ক মদন কলিতাৰ মৃত্যু

নলবাৰী সমষ্টিৰ প্ৰাক্তন বিধায়ক মদন কলিতাৰ আকস্মিকভাবে মৃত্যু হয়৷ হৃদৰোগত আক্ৰান্ত হৈ যোৱা নিশা প্ৰায় দহ বজাত আকস্মিকভাবে মৃত্যুৰ মুখত পৰে প্ৰাক্তন কংগ্ৰেছী বিধায়ক গৰাকী৷ গুৱাহাটীৰ বাসভৱনত মৃত্যু হয় তেওঁৰ৷ ২০০১ চনৰ পৰা ২০০৬ চনলৈ নলবাৰী সমষ্টিৰ কংগ্ৰেছী বিধায়ক আছিল তেওঁ৷ সুদীৰ্ঘ ৩৩ বছৰৰ মূৰত নলবাৰী সমষ্টিক কংগ্ৰেছৰ দখললৈ আনিবলৈ সক্ষম হৈছিল মদন কলিতাই৷২০০৬ ৰ নিৰ্বাচনত অগপৰ অলকা শৰ্মাৰ হাতত পৰাজিত হয় ৷২০১১ চনৰ নিৰ্বাচনত কংগ্ৰেছৰ টিকটৰ পৰা বঞ্চিত হৈ উক্ত নিৰ্বাচনত নিৰ্দলীয় প্ৰাৰ্থী হিচাপে নলবাৰী সমষ্টিত প্ৰতিদ্বন্দিতা আগবঢ়াই পৰাজিত হৈছিল৷ পৰৱৰ্তী সময়ত তেওঁ অগপ দলত যোগদান কৰিছিল৷ মদন কলিতা বিধায়ক হৈ থকা কালত পত্নী চাৰুবালা কলিতা ঘগ্ৰাপাৰ জিলা পৰিষদৰ পৰা জয়ী হৈ নলবাৰী জিলা পৰিষদৰ উপ সভানেত্ৰী আৰু পিচলৈ ভাৰপ্ৰাপ্ত সভানেত্ৰী হিচাপে কাৰ্যনিৰ্বাহ কৰিছিল৷ মৃত্যুৰ সময়ত তেওঁ পত্নী, প্ৰতিষ্ঠিত ব্যৱসায়ী পুত্ৰ আৰু এ চি এছ বিষয়া দুই কন্যা ইহসংসাৰত এৰি থৈ যায়৷ তেওঁৰ আকস্মিক মৃত্যুত নলবাৰীত গভীৰ শোকৰ ছাঁ পৰিছে৷ মদন কলিতা প্ৰাক্তন মুখ্যমন্ত্ৰী প্ৰয়াত তৰুণ গগৈৰ অতি প্ৰিয়ভাজন আছিল৷

নলবাৰীৰ পৰা ফইজুল হক চৌধুৰীৰ