বিশ্বনাথৰ প্ৰচাৰ বিমুখ জনপ্ৰিয় কণ্ঠশিল্পী ৰাজু ৰংপীৰ আদিবাসী অডিঅ গীত শীঘ্ৰেই মুক্তিৰ পথতঃ
বিশ্বনাথ পৰা ৰমেশ চন্দ্ৰ চৰেণ’ৰ ৰিপৰ্ট , ৯ ফেব্ৰুৱাৰী ঃ বিশ্বনাথ জিলাৰ অসম অৰুণাচল সীমান্তৱৰ্তীৰ একেবাৰে পিছপৰা ১ নং দিলীচাং গাওঁৰ প্ৰচাৰবিমুখ কাৰ্বি জনগোষ্ঠীৰ জনপ্ৰিয় কণ্ঠশিল্পী ৰাজু ৰংপী ৷ অতি দুখ কষ্টৰ মাজতো নিৰৱে সংগীতৰ সাধনা কৰি আহিছে ৷ দুবেলা দুমুঠি ভাতৰ বাবে কঠোৰ সংগ্ৰাম কৰিবলগা হোৱা কণ্ঠশিল্পী গৰাকীয়ে একাগ্ৰতাৰ বলত সংগীতৰ চৰ্চা অব্যাহত ৰাখিছে ৷ উল্লেখ্য কিছুদিন পুৰ্বে পৰিয়ালৰে দুজনকৈ আত্মীয়ক হেৰুৱাব লগা হোৱাত মানসিকভাবে ভাগি পৰিছে সকলোৰে মৰমৰ ৰাজু ৰংপী ৷ অন্য উপায়ো নাই , ভগৱানৰ নামত সান্তনা দি গীতৰ অনুশীলন চলাই যাবৰ বাবে কিশোৰমনৰ শিল্পী ৰাজু ৰংপীক উৎসাহ উদ্দীপনা দি আহিছে তেওঁৰে শুভাকাংক্ষী সকলে ৷ অৱশেষত ব্যথিত মনক কোনোমতে সংযম কৰি শুভাকাংক্ষী সকলৰ উৎসাহ উদ্দীপনাত আদিবাসী ৰোমাণ্টিক গীত এটি বাণীবদ্ধ কৰাৰ প্ৰয়াস কৰে ৷ সম্পুৰ্ণ আদিবাসী ভাষাৰ ” এক দুই তিন চাৰ বাটে , তকে পটাই লেব ৰে” শীৰ্ষক গীতটি বিশ্বনাথ চাৰিআলিৰ অংকুৰ শইকীয়াৰ সংগীত পৰিছালনা আৰু ব্যৱস্থাপনাৰে আদিবাসী গীতটি বাণীবদ্ধ কৰাবলৈ সক্ষম হয় ৷ গীতটিৰ লেখক আৰু সুৰ সংযোজন কৰিছে অসমৰ খ্যাতনামা কণ্ঠশিল্পী নৰেন পানতাঁতিয়ে ৷ মন কৰিবলগা যে অসমৰ স্বনামধন্য আদিবাসী চাহ জনগোষ্ঠীৰ কণ্ঠশিল্পী নৰেন পানতাঁতিৰ সু-দিহা পৰামৰ্শ সাপেক্ষে ৰাজুয়ে গীতটি বাণীবদ্ধ কৰাই ৷ একাধিক ক্ৰমে কাৰ্বি , আদিবাসী , বড়ো , অসমীয়া আৰু হিন্দী ভাষাত সু-স্পষ্ট আৰু সুললিত সুৰে সকলো শ্ৰেণীৰ লোকৰে অন্তৰ চুই যাব পৰাকৈ গীত গাব পৰা ৰাজুয়ে সংগীতৰ আনুষ্ঠানিক শিক্ষা অবিহনেই চৰ্চিত হৈছে ৷ সুৰৰ খলকনিৰ সৃষ্টি কৰা ৰাজু ৰংপীয়ে সদ্যসমাপ্ত Karbi Anglong Singing Suparstarৰ ৰিয়েলিটি শ্বত অংশগ্ৰহণ কৰি প্ৰথম স্থান দখল কৰি বিশ্বনাথ জিলাখনৰ এক গৌৰৱ কঢ়িয়াই আনে ৷ সম্প্ৰতি যুৱ কণ্ঠশিল্পী গৰাকী কাৰ্বি বোলছবিতো গীত পৰিবেশন কৰাৰ সুযোগ লাভ কৰা বুলি এই প্ৰতিবেদকক জানিবলৈ দিছে ৷ ইতিমধ্যে বাণীবদ্ধ হোৱা আদিবাসীমুলৰ গীতটি শুভমুক্তিৰ বাবে মনস্থ কৰি যাৱতীয় প্ৰস্তুতিও সম্পুৰ্ণ কৰিছে ৷ অহা ১৫ ফেব্ৰুৱাৰীত গীতটি মুক্তি লাভ কৰিব ৷ Raju Rongpi Official নামৰ ইউটিউব চেনেলত শুভমুক্তি লাভ কৰিব লগা গীতটি উপলব্ধ হব ৷ সেয়েহে কিশোৰমনৰ শিল্পী গৰাকীৰ প্ৰথম প্ৰয়াস স্বৰূপ আদিবাসী গীতটি অসমবাসী ৰাইজে আদৰি লব বুলি আশা প্ৰকাশ কৰে ৷ লগতে “Raju Rongpi Official ” নামৰ ইউটিউব চেনেলটি চাবক্ৰাইব , লাইক , কমেণ্ট আৰু চেয়াৰ কৰি আনকো উপভোগ কৰাৰ সুযোগ প্ৰদান কৰিব বুলি আহ্বান জনাই ৰাজু ৰংপীয়ে ৷
