অসমৰ ৰাজনৈতিক প্ৰেক্ষাপটত ২০২৬ চনৰ বিধানসভা নিৰ্বাচনে এক নিৰ্ণায়ক মোৰ ল’বলৈ গৈ আছে, য’ত যুৱপ্ৰজন্মৰ স্থিতি আটাইতকৈ গুৰুত্বপূৰ্ণ হিচাপে বিবেচিত হৈছে। ভাৰতৰ নিৰ্বাচন আয়োগে যোৱা ১৫ মাৰ্চত ঘোষণা কৰা শেহতীয়া সূচী অনুসৰি , অহা ৯ এপ্ৰিলত ৰাজ্যখনৰ ১২৬টা বিধানসভা সমষ্টিৰ বাবে কেৱল এটা পৰ্যায়তে ভোটগ্ৰহণ সম্পন্ন হ’ব আৰু ৪ মে’ত ইয়াৰ ফলাফল ঘোষণা কৰা হ’ব। প্ৰায় ২৫ বছৰৰ পাছত একেটা পৰ্যায়ত অনুষ্ঠিত হ’বলগীয়া এই নিৰ্বাচনত ৰাজ্যৰ ২.৪৯ কোটি পঞ্জীয়নভুক্ত ভোটাৰে নিজৰ ভোটাধিকাৰ সাব্যস্ত কৰিব। তাৎপৰ্যপূৰ্ণ বিষয়টো হ’ল, ১৮ৰ পৰা ২৯ বছৰ বয়সৰ যুৱ ভোটাৰৰ সংখ্যা ৭২ লাখ ৮৩ হাজাৰলৈ বৃদ্ধি পাইছে, য’ত ৬ লাখ ২৮ হাজাৰ প্ৰথমবাৰৰ ভোটাৰ অন্তৰ্ভুক্ত। পৰম্পৰাগত ৰাজনৈতিক আনুগত্যৰ সলনি, এই বিশাল আৰু সচেতন যুৱশক্তিয়ে এতিয়া প্ৰগতি, আধুনিক শিক্ষা আৰু উত্তৰদায়ী নেতৃত্বৰ ভিত্তিত নিজৰ প্ৰতিনিধি নিৰ্বাচন কৰাৰ যি প্ৰৱণতা দেখুৱাইছে, সিয়ে শাসক আৰু বিৰোধী উভয় শিবিৰৰ বাবেই এক বৃহৎ প্ৰত্যাহ্বানৰ সৃষ্টি কৰিছে।
যুৱ ভোটাৰক আকৰ্ষিত কৰিবলৈ ৰাজ্য চৰকাৰে বিভিন্ন অভিলাষী আঁচনি গ্ৰহণ কৰিলেও, ৰাজ্যখনৰ প্ৰকৃত অৰ্থনৈতিক বাস্তৱতা আৰু চৰকাৰী দাবীৰ মাজত এক স্পষ্ট ব্যৱধান পৰিলক্ষিত হৈছে। চৰকাৰে ১ লাখ ৫০ হাজাৰৰো অধিক যুৱক-যুৱতীক স্বচ্ছতাৰে চৰকাৰী চাকৰি প্ৰদান কৰাৰ লগতে জাগীৰোডত ২৭,০০০ কোটি টকা ব্যয়সাপেক্ষে ‘অ’ছাট’ প্ৰকল্পৰ জৰিয়তে নিয়োগৰ নতুন পথ মুকলি কৰাৰ দাবী কৰিছে। কিন্তু চৰকাৰী তথ্যমতেই ২০২৫ চনৰ ফেব্ৰুৱাৰীলৈকে অসমত ২১.৩১ লাখ শিক্ষিত নিবনুৱা পঞ্জীভুক্ত হৈ আছে আৰু নিবনুৱা সমস্যাৰ হাৰ ৩.৯ শতাংশলৈ বৃদ্ধি পাইছে। ইয়াৰ সমান্তৰালভাৱে, চৰকাৰে ৰাজ্যৰ জিএছডিপি ৭.৪২ লাখ কোটি টকালৈ বৃদ্ধি পোৱাৰ কথা ক’লেও, ৰাজ্যখনৰ ঋণগ্ৰস্ততা জিএছডিপিৰ ২৫ শতাংশ স্পৰ্শ কৰাটোৱে ভৱিষ্যতৰ অৰ্থনৈতিক সুৰক্ষাৰ প্ৰতি এক গভীৰ ভাবুকি কঢ়িয়াই আনিছে। প্ৰতি বছৰে বানপানীয়ে কৰা ৫,০০০ কোটি টকাৰ বিস্তৰ ক্ষতিয়ে ঔদ্যোগিক বিকাশ মন্থৰ কৰিছে, যাৰ বাবে আধুনিক যুৱপ্ৰজন্মই কেৱল ‘অৰুণোদয়’ৰ দৰে সাময়িক হিতাধিকাৰী আঁচনিৰ পৰিৱৰ্তে কৃত্ৰিম বুদ্ধিমত্তাৰ দৰে আধুনিক প্ৰযুক্তিগত শিক্ষা আৰু বান সমস্যাৰ বিজ্ঞানসন্মত স্থায়ী সমাধান বিচাৰে।
প্ৰাক-নিৰ্বাচনী কালছোৱাত অসমৰ সামগ্ৰিক ৰাজনৈতিক পৰিৱেশ ধৰ্মীয় মেৰুকৰণ আৰু আদৰ্শহীনতাৰ মাজেৰে গতি কৰা দেখা গৈছে, যিয়ে শিক্ষিত নৱপ্ৰজন্মক ৰাজনৈতিক ব্যৱস্থাটোৰ প্ৰতিয়েই নিৰাশ কৰি তুলিছে। নিৰ্বাচনৰ ঠিক পূৰ্বে শীৰ্ষ ৰাজনৈতিক নেতাসকলে নিজৰ ৰাজনৈতিক স্বাৰ্থ সুৰক্ষিত কৰিবলৈ দীৰ্ঘদিনীয়া সম্পৰ্ক ছিন্ন কৰি শাসনাধিষ্ঠিত দলত যোগদান কৰা ঘটনাই ৰাজ্যৰ সুবিধাবাদী ‘দল বাগৰা ৰাজনীতি’ৰ এক উলংগ স্বৰূপ উদঙাই দিছে। আনহাতে, নিৰ্বাচনী বৈতৰণী পাৰ হোৱাৰ স্বাৰ্থত নেতাসকলে সঘনাই সাম্প্ৰদায়িক আৱেগক অস্ত্ৰ হিচাপে ব্যৱহাৰ কৰা দেখা গৈছে; বিশেষকৈ ভোটাৰ তালিকা সংশোধনীৰ প্ৰসংগত ‘মিয়া মুছলমান’ ভোটাৰ সন্দৰ্ভত কৰা মন্তব্য আৰু বেদখল উচ্ছেদৰ নামত চলোৱা ৰাজনীতিয়ে সমাজত বিভাজনৰ সৃষ্টি কৰিছে। ইয়াৰ বিপৰীতে বিৰোধী শক্তিসমূহেও কোনো সুপৰিকল্পিত গঠনমূলক কাৰ্যসূচী আগবঢ়োৱাৰ সলনি কেৱল টুলুঙা সমালোচনাতে আৱদ্ধ থকা দেখা গৈছে, যিটোৱে সুস্থ বিতৰ্কৰ পোষকতা কৰা যুৱপ্ৰজন্মক বাৰুকৈয়ে ক্ষুণ্ণ কৰিছে।
অৰ্থনৈতিক আৰু উন্নয়নমূলক বিষয়ৰ উপৰিও, কেইটামান স্পৰ্শকাতৰ আৱেগিক আৰু সামাজিক বিষয় এইবাৰৰ নিৰ্বাচনত নিৰ্ণায়ক কাৰক হৈ পৰিব। যোৱা ১৯ ছেপ্টেম্বৰ, ২০২৫ তাৰিখে ছিংগাপুৰত শিল্পী জুবিন গাৰ্গৰ আকস্মিক মৃত্যুৱে সৃষ্টি কৰা শোকৰ ছাঁ এতিয়া এক বৃহৎ ৰাজনৈতিক ধুমুহালৈ পৰ্যবসিত হৈছে। শাসক-বিৰোধী উভয় দলেই ন্যায় বিচৰাৰ নামত ইয়াক ৰাজনৈতিক অস্ত্ৰ হিচাপে ব্যৱহাৰ কৰিবলৈ বিচৰা কাৰ্যই প্ৰকৃত অনুৰাগীসকলক বিতুষ্ট কৰিছে। আনহাতে, অসমৰ ছয় জনগোষ্ঠীক অনুসূচিত জনজাতিৰ মৰ্যাদা প্ৰদানৰ প্ৰক্ৰিয়াটোৱে নিৰ্বাচনী সমীকৰণ অধিক জটিল কৰি তুলিছে, কাৰণ বৰ্তমানৰ জনজাতীয় সংগঠনসমূহৰ সমন্বয়ৰক্ষী সমিতিয়ে সংৰক্ষণৰ সীমা ৭০ শতাংশলৈ বৃদ্ধি পোৱাৰ আশংকাত ইয়াৰ তীব্ৰ বিৰোধিতা কৰিছে। এনে এক স্পৰ্শকাতৰ আৰু জটিল প্ৰেক্ষাপটত, যিটো ৰাজনৈতিক দলে সাম্প্ৰদায়িক বিভাজনৰ সলনি এখন দুৰ্নীতিমুক্ত, স্বাৱলম্বী, কৰ্মসংস্থাপনমুখী আৰু সকলো জাতি-জনগোষ্ঠীৰ ন্যায্য অধিকাৰ সুৰক্ষিত কৰা নৱ-অসম গঢ়াৰ বাস্তৱসন্মত ৰূপৰেখা দাঙি ধৰিব পাৰিব, সেই দলৰ প্ৰতিয়েই অসমৰ বিবেকবান যুৱ ভোটাৰসকলে অহা ৯ এপ্ৰিলত নিজৰ নিৰ্ণায়ক সমৰ্থন আগবঢ়োৱাৰ পূৰ্ণ সম্ভাৱনা আছে।
#প্ৰতিবেদকঃ প্ৰণৱজ্যোতি গগৈ
