♦ মুখ্যমন্ত্রী ড০ হিমন্ত বিশ্ব শর্মাই আজি গুৱাহাটীত নিষিদ্ধ ঘোষিত উগ্রপন্থী সংগঠন, আলফাৰ প্ৰাক্তন সদস্য, নির্যাতিত পৰিয়াল তথা সন্ত্রাস নির্মূল অভিযানত আঘাতপ্রাপ্ত আৰু নিৰুদ্দিষ্ট সদস্যৰ নিকটাত্মীয়কে ধৰি মুঠ ৯৩৬ গৰাকী সদস্যক পুনসংস্থাপনৰ বাবে আর্থিক সাহায্য প্ৰদান কৰে। অনুষ্ঠানত সন্ত্রাস নির্মূল অভিযানত আঘাতপ্রাপ্ত ৪৫ গবাকী সদস্যক ৩ লাখ টকাকৈ, ৮ গৰাকী নির্যাতিত লোকক ৫ লাখ টকাকৈ, ৩১ গৰাকী নিৰুদ্দিষ্ট সদস্যৰ পৰিয়ালক ১০ লাখ টকাকৈ প্ৰদান কৰা হয়। তদুপৰি ভাৰত চৰকাৰৰ উত্তৰ-পূবৰ উগ্ৰপন্থী সদস্যসমূহৰ মূলসুঁতিলৈ প্ৰত্যাৱৰ্তন আৰু পুনসংস্থাপন আঁচনিৰ অধীনত ৮৫২ গৰাকী প্রাক্তন সদস্যক ৪ লাখ টকা আৰু অসম চৰকাৰৰ বিশেষ পুঁজিৰ অধীনত ৩ লাখ টকাৰ এককালীন সাহায্য প্রদান কৰা হয়। উল্লেখযোগ্য যে আলফা সংগঠনে চৰকাৰৰ সৈতে হোৱা কেইবালানিও আলোচনাৰ অন্তত যোৱা বছৰৰ ২৯ ডিচেম্বৰত ভাৰত চৰকাৰ তথা ৰাজ্য চৰকাৰৰ সৈতে শান্তি চুক্তিত স্বাক্ষৰ কৰে। এই চুক্তি অনুসৰি আলফাই সংগঠনটোৰ ভংগ কৰাৰ ঘোষণা কৰাৰ লগতে মনোনীত শিবিৰসমূহ খালী কৰি দিয়ে।
আজিব অনুষ্ঠানত প্ৰদান কৰা এককালীন সাহায্যৰ উপযুক্ত ব্যৱহাৰৰ জৰিয়তে স্বাৱলম্বী হ’ব পৰাকৈ প্ৰতিগৰাকী সদস্যৰ বাবে দক্ষতা বিকাশ কার্যক্রমৰ অধীনত বিভিন্ন বৃত্তিগত প্ৰশিক্ষণৰ আঁচনিয়ো গ্ৰহণ কৰা হৈছে৷ অনুষ্ঠানত মুখ্যমন্ত্ৰী ড০ হিমন্ত বিশ্ব শৰ্মা মুখ্য অতিথি হিচাপে উপস্থিত থকাৰ লগতে মন্ত্রী যোগেন মহন, মুখ্য সচিব পৱন কুমাৰ বৰঠাকুৰ, আৰক্ষী সঞ্চালক প্রধান জি পি সিঙকে ধৰি কেইবাগৰাকীও জ্যেষ্ঠ বিষয়া উপস্থিত থাকে।
