চৰকাৰৰ দুমুখীয়া নীতিৰ বাবেই ভাষাক লৈ দুষ্কাৰ্য, বাথানট্টাৰী ধৰ্মীয় সভা সম্পন্ন

■ নলবাৰী : টিহু মহকুমাৰ ওচৰৰ বাথানট্টাৰী গাঁও উন্নয়ন সমিতিৰ উদ্যোগত ২০ অক্টোবৰত বাথানট্টাৰী প্ৰাথমিক বিদ্যালয় প্ৰাংগণত দিনযোৰা কাৰ্যসূচীৰে অষ্টম সংখ্যক বাথানট্টাৰী ধৰ্মীয় সভা মহোৎসৱ সম্পন্ন হয় । এই উপলক্ষে বাথানট্টাৰী গাঁও উন্নয়ন সমিতিৰ সভাপতি প্ৰহ্লাদ হালৈৰ পৌৰোহিত্যত আয়োজিত এখন ধৰ্মালোচনা সভাত বিশিষ্ট অতিথি হিচাপে নলবাৰী জিলা সাহিত্য সভাৰ সম্পাদক পংকজ বেজবৰুৱাই ভাগ লয় । ভাষণ প্ৰসংগত তেওঁ কয় যে বৰাকত অসমীয়া ফলকত বঙালী লোকে ক’লা ৰং সানি অসমীয়া ভাষাৰ প্ৰতি একাংশ বঙালী লোকৰ এতিয়াও যে
নিকৃষ্ট মনোভাব আছে, সেয়া প্ৰকট কৰিছে । ৰাজ্য ভাষা প্ৰয়োগ নীতি কাৰ্যকৰণত চৰকাৰৰ দুমুখীয়া নীতিৰ বাবেই ভাষাক লৈ এই সকলো দুষ্কাৰ্য সংঘটিত হৈছে । চৰকাৰক ৰাজ্য ভাষা প্ৰয়োগ নীতি কাৰ্যকৰণৰ বাবে দাবী জনাই তেওঁ কয় — সকলো অসমীয়াই অসমীয়া ভাষা ভালদৰে চৰ্চা আৰু প্ৰসাৰত গুৰুত্ব দি এনে ঘটনাৰ কাৰকক ওফৰাই দিব পাৰি । তাৰ বাবে অসমীয়া কাকত– আলোচনী নিয়মীয়াকৈ পঢ়া আৰু সম্প্ৰতি প্ৰযুক্তি মুক্তধাৰাৰ বিভিন্ন ব্যৱস্থাত অসমীয়া ভাষা অধিকভাৱে ব্যৱহাৰ কৰাৰ ক্ষেত্ৰত গুৰুত্ব দিব লাগিব বুলি তেওঁ দোহাৰে । বাথানট্টাৰী গাঁও উন্নয়ন সমিতিৰ সম্পাদক পংকজ পাঠকে আঁত ধৰা এই সভাত টিহু মহকুমা সাংবাদিক সন্থাৰ সম্পাদক ভাস্কৰজ্যোতি কলিতা আৰু স্থানীয় সমাজকৰ্মী মনেশ্বৰ কলিতায়ো ভাগ লয় । ইয়াৰ পূৰ্বে কাৰ্যসূচী অনুসৰি পুৱা বাথানট্টাৰী গাঁও উন্নয়ন সমিতিৰ সভাপতি প্ৰহ্লাদ হালৈয়ে ধৰ্মীয় সভাৰ পতাকা উত্তোলনেৰে ধৰ্মীয় সভা মহোৎসৱৰ নিৰ্দিষ্ট কাৰ্যসূচীৰ শুভাৰম্ভ কৰে । বন্তি প্ৰজ্বলন কৰে স্থানীয় বিশিষ্ট সমাজকৰ্মী মধু কলিতাই । শ্বহীদ পৰিয়ালৰ সদস্যই শ্বহীদ স্মৃতি তৰ্পণ কৰে । গছপুলি ৰোপণ কৰে বাথানট্টাৰী গাঁও উন্নয়ন সমিতিৰ উপ সভাপতি ৰমেশ পাঠকে ।ভাগৱত শোভাযাত্ৰা উদ্বোধন কৰে ডাক বিভাগৰ অৱসৰীয়া কৰ্মচাৰী চণ্ডী কলিতাই । এই শোভাযাত্ৰাত ভাগৱত বহন কৰে সমাজকৰ্মী নন্দৰাম বড়ো আৰু প্ৰণামী বন্তি বহন কৰে সমাজকৰ্মী গৌতম ডেকাই । ধৰ্মীয় সভা মহোৎসৱৰ দ্বাৰ উদ্ঘাটন কৰে জলখানা–ভঠুৱাখানা গাঁও উন্নয়ন সমিতিৰ সভাপতি অজিত হালৈয়ে । আবেলি ভাগৱত পাঠ আৰু ব্যাখ্যা কৰে বিশিষ্ট সমাজকৰ্মী মধু কলিতাই । স্থানীয় ভকতবৃন্দৰদ্বাৰা নাম–কীৰ্তন কৰাৰ পাছত সন্ধিয়া নাগাৰা নামৰ প্ৰখ্যাত শিল্পী শংকৰ তালুকদাৰ আৰু তেওঁৰ সংগীবৃন্দৰদ্বাৰা নাগাৰা নাম পৰিৱেশনেৰে সমাজত শান্তি সম্প্ৰীতি কামনা কৰি সভা মহোৎসৱ সামৰা হয় ।