কৃষ্ণাইত স্বামী স্ত্ৰীৰ দেহত কৰ’না পজিটিভঃ জ্যোতিনগৰবাসীৰ মাজত আতংক

■ কৃষ্ণাইৰ পৰা কন্দৰ্প কুমাৰ দেৱ নাথঃ
গোৱালপাৰা জিলাৰ কৃষ্ণাইত আজি দুগৰাকী ব্যক্তিৰ দেহত মহামাৰী কৰ’নাৰ অৱস্থিতি ধৰা পৰিছে৷ আক্ৰান্ত লোক দুগৰাকীৰ নাম বলোৰাম বিশ্বাস (৩৪) আৰু মৌচুমী বিশ্বাস (৩০)৷ সম্বন্ধত তেওঁলোক
স্বামী-স্ত্ৰী৷ উল্লেখ্য যে কৰ’না মহামাৰীৰ দ্বিতীয়টো লহৰত আক্ৰান্ত কৃষ্ণাইৰ এইটোৱে প্ৰথম ঘটনা। আজি কৃষ্ণাই ক্ষুদ্ৰ প্ৰাথমিক স্বাস্থ্য কেন্দ্ৰত চলি থকা ৰেপিড টেষ্টৰ সময়তে এই দুগৰাকী ব্যক্তিৰ দেহত কৰ’না পজিটিভৰ অৱস্থিতি পোহৰলৈ আহে।

স্বাস্থ্য বিভাগৰ এক সূত্ৰই প্ৰকাশ কৰা অনুসৰি, আজি কৃষ্ণাই ক্ষুদ্ৰ প্ৰাথমিক স্বাস্থ্য কেন্দ্ৰত মুঠ ২৫ লোকৰ ৰেপিড পৰীক্ষা কৰা হৈছিল৷ ইয়াৰ মাজতে বলোৰাম বিশ্বাস আৰু মৌচুমী বিশ্বাসৰ দেহত কৰ’না পজিটিভ ধৰা পৰে৷ জানিব পৰা মতে, বলোৰাম বিশ্বাস আৰু মৌচুমী বিশ্বাসে জিএমচিএইচত থকা কোনোবা ৰোগীৰ খবৰ লৈ কালি সন্ধিয়া গুৱাহাটীৰ পৰা কৃষ্ণাইলৈ উভতি আহিছিল৷ জ্যোতিনগৰ নিবাসী এই দম্পতীৰ দেহত কৰ’নাৰ অৱস্থিতি ধৰা পৰাৰ পিছতে সমগ্ৰ কৃষ্ণাইতে আতংকই বিৰাজ কৰিছে৷ ইফালে আক্ৰান্ত লোক দুগৰাকীক স্বাস্থ্য বিভাগে ইতিমধ্যে ক’ভিড ১৯ৰ প্ৰট’কল অনুসৰি হোম আইছ’লেচনৰ ব্যৱস্থা কৰা বুলি বিভাগীয় সূত্ৰটোৱে জানিবলৈ দিছে৷

উল্লেখ্য যে যোৱা পৰহি কৃষ্ণাইৰ কাষৰীয়া লালাবৰি চৌধুৰীপাৰাতো কমল ৰায় নামৰ এজন যুৱকৰ দেহত কৰ’না পজিটিভ ধৰা পৰে৷ যুৱক জনৰ পৰিয়ালটোক ইতিমধ্যে হোম কোৰেন্টাইনত ৰখাৰ ব্যৱস্থা কৰিছে স্বাস্থ্য বিভাগে৷ জানিব পৰা মতে, কৰ্মসূত্ৰে গুৱাহাটীত থকা কমল ৰায় ঘৰত অহাৰ পিছতে অসুস্থ হয় আৰু তেওঁৰ দেহত কৰ’নাৰ অৱস্থিতি ধৰা পৰে৷