কবিতা মোৰ বাবে
কবিতা মোৰ বাবে ভাৱনাবোৰৰ থুনুপাক ,
মোৰ মনৰ লিখিত বক্তব্য ৷
শব্দৰ উপত্যকাৰ প্ৰাচীনতম পিৰামিড ৷
পথাৰৰ নিৰ্জন সুহুৰি
পদপথ ৰাজপথৰ শোভাযাত্ৰা ৷
জীৱনৰ নাটৰ আৱহসঙ্গীত
মন দিগবলয়ৰ এসোঁতা হেঙুল
শব্দৰ নিস্তৰঙ্গ সমুদ্ৰ ৷
কিতাপৰ বুকুৰ মৈলাম
মোৰ বাবে কল্পনাৰ গন্ধসৰৈ ৷
কবিতা ৰ’দে পোৰা দেহৰ
তপত হুমুনিয়াহ ,
পুৰা মাটিৰ ছাইৰঙী হেপাঁহ।
কবিতা শাওনৰ এবুকু সেউজীয়া
আহিনৰ গেৰেলী কাতিৰ গাখীৰতী
আঘোণৰ কান্ধ ভাৰি দাঙৰি ,
ভঁৰালৰ সোণোৱালী সুৱাগমণি ৷
নিৰঞ্জন দাস ৰাংছালী বিহালী
