◊ টংলাৰ পৰা চিন্ময় ডেকাঃ ওদালগুৰি জিলাৰ অন্তৰ্গত টংলা সাহিত্য সভা ভৱনত আজি ওদালগুৰি জিলা লেখিকা সমাৰোহ সমিতিৰ উদ্যোগত আৰু টংলা লেখিকা সমাৰোহ সমিতিৰ সহযোগত দ্বাবিংশতিতম জাতীয় চেতনা দিৱস পালন কৰা হয়। সভাত বন্তি প্ৰজ্বলন কৰে টংলা লেখিকা সমাৰোহ সমিতিৰ সভানেত্ৰী চন্দ্ৰ প্ৰভা দত্তই, জাতীয় ছহিদ বীৰাংগনা কনকলতা বৰুৱাৰ প্ৰতিচ্ছবিত মাল্যাৰ্পণ কৰে জিলা সমিতিৰ সভানেত্ৰী বিনু ডেকাই।
চিৰ চেনেহী মোৰ ভাষা জননী গীতেৰে আৰম্ভ কৰা সভাখনত সভাপতিত্ব কৰি বিনু ডেকাই ভাৰতৰ স্বাধীনতা সংগ্ৰামত কনকলতাৰ অৱদান সম্পৰ্কে ব্যাখ্যা দাঙি ধৰে। লগতে জিলাৰ সম্পাদিকা ক্ষীৰা শইকীয়া ডেকাই আঁত ধৰা স্মৃতি চাৰণ সভাখনত বক্তৃতা আগবঢ়ায় ক্ৰমে শান্তি বালা দত্ত, পূৰ্ণিমা ভূঞা, বিজয়া বৰা, শাৰদী আচাৰ্য, ভদ্ৰেশ্বৰী শৰ্মা, চম্পা হাজৰিকাই।
অনুষ্ঠানত গীত পৰিৱেশন কৰে দুলুমনি বেকাৰ, কনকলতা বৰুৱা আৰু চিত্ৰলেখা ডেকাই, প্ৰেমলতা ডেকা, ৰুক্মিণী কাকতিয়ে লগতে নৃত্য পৰিবেশন কৰে নিতুমনি নাথ, কবিতা পাঠ ৰীতা দেৱী, অনুপমা ডেকাৰ, সবিতা দেৱী, ৰশ্মি ৰেখা ৰাভা, শেৱালী ৰাভাই।
অনুষ্ঠানত অনুগল্প পাঠ কৰে তৰুলতা বেকাৰ। উক্ত সভাত কেইবাগৰাকী মহিলাক জিলাৰ তৰফৰ পৰা অনুপ্ৰেৰণা মূলক সম্বৰ্দ্ধনা সূচক মানপত্ৰ প্ৰদান কৰা হয়। শেষত জাতীয় সঙ্গীত পৰিৱেশনেৰে সভাৰ সফল পৰিসমাপ্তি ঘটে।
