আঞ্চলিক বতৰ বিজ্ঞান কেন্দ্ৰৰ ডাঠ কুঁৱলীৰ সতৰ্কবাণী ; দুৰ্ঘটনা ৰোধৰ বাবে নিশাৰ ভাগত সাৱধানতাৰে বাহন চলাবলৈচালকক আহ্বান পৰিবহণ বিভাগৰ
বিগত কিছুদিন ধৰি ৰাজ্যৰ বেছিভাগ ঠাইতে ডাঠ কুঁৱলীৰ আবৰণে ঢাকি ধৰা পৰিলক্ষিত হৈছে। আনকি পথত নিশাৰ ভাগত কেবাটাও সৰু-বৰ পথ দুৰ্ঘটনা সংঘটিত হৈছে। যত ডাঠ কুঁৱলীৰ ফলত দৃশ্যমানতা হ্ৰাস পোৱা বাবে চালকে ৰাজপথত সন্মুখত কি আছে তাক মনিব নোৱাৰা বাবে বাহন দুৰ্ঘটনাত পতিত হৈ কেবাজনো লোকে কৰুণভাবে মৃত্যুক আঁকোৱালি লোৱাৰ লগতে আন বহুজন আহত হৈ চিকিৎসাধীন হবলগা হৈছে। যাৰ বাবে কুঁৱলী কেন্দ্ৰীক দুৰ্ঘটনা ৰোধ কৰিবলৈ ৰাজ্য চৰকাৰৰ পৰিবহণ বিভাগ সাজু হোৱাৰ লগতে সজাগতা অভিযান আৰম্ভ কৰিছে। আনকি মুখ্যমন্ত্ৰী ডঃ হিমন্ত বিশ্ব শৰ্মায়ো নৱবৰ্ষৰ প্ৰাকক্ষণত সংবাদ মাধ্যমৰ জৰিয়তে কুঁৱলীকেন্দ্ৰীক দুৰ্ঘটনা ৰোধ কৰাৰ স্বাৰ্থত অতি জৰুৰী নহলে মাজনিশাৰ পৰা পুৱালৈ পথত বাহন নচলাবলৈ চালক সকলক আহ্বান জনাইছে।
আনহাতে এই সন্দৰ্ভত ৰাজ্য চৰকাৰৰ পৰিবহণ বিভাগৰ বিশেষ কৰ্তব্যৰত বিষয়া আৰু কামৰূপ মহানগৰ জিলাৰ অতিৰিক্ত দায়িত্ববাহী জিলা পৰিবহণ বিষয়া (পঞ্জীয়ন আৰু অনুজ্ঞাপত্ৰ) গৌতম দাসে জানিবলৈ দিয়া মতে ইতিমধ্যে ভাৰত চৰকাৰৰ অধীনৰ গুৱাহাটীৰ বৰঝাৰস্থিত আঞ্চলিক বতৰ বিজ্ঞান কেন্দ্ৰই আগন্তক দিনত নিশাৰ ভাগত ৰাজ্যৰ বেছিভাগ অঞ্চলতে কেবাদিনলৈ ডাঠ কুঁৱলীৰ আচ্ছাদনে ঢাকি ৰাখিব বুলি সতৰ্কতা জাৰি কৰিছে। আনকি পাহাৰীয়া স্থান, নৈপৰীয়া অঞ্চল, জলাশয় আৰু মুকলি পথাৰৰ মাজেৰে যোৱা বাট পথ সমূহ সন্ধিয়াৰ পাছত যথেষ্ট কুঁৱলী পৰিব বুলি বতৰ বিজ্ঞান বিভাগে আগতীয়াকৈ সতৰ্কতা জাৰি কৰিছে। যাৰ বাবে নিশাৰ ভাগত ৰাজপথত বাহন চলাওতে অত্যন্ত সতৰ্কতাৰে বাহন চলাবলৈ আৰু বিশেষ জৰুৰী নহলে নিশা ১০ বজাৰ পৰা পাছদিনা ৰাতিপুৱালৈ বাহন নচলাবলৈ চালকক আহ্বান জনোৱা হৈছে । গৌতম দাসে সদৰি কৰা অনুসৰি যদি এই সময়ছোৱাত নিশাৰ ভাগত জৰুৰী কাৰণত বাহন চলাব লাগে তেন্তে সন্মুখত ফগ লাইট জ্বলাই অতি সীমিত গতিবেগতহে বাহন চলাব লাগে।
আকৌ যদি বাহনখন ৰখাব লাগে তেন্তে পথৰ দাঁতিত সুৰক্ষিত স্থানত প্ৰধান পথত বাধা নোহোৱাকৈ পাৰ্কিং লাইট জ্বলাইহে ৰাখিব লাগে। আকৌ কুঁৱলী দি থকা অৱস্থাত লাহে লাহে বাহন চলালেও মাজে মাজে সন্মুখৰ আইনাৰ উইপাৰ ব্যৱহাৰ কৰি থাকিব লাগে যাতে আইনাখন পৰিস্কাৰ হৈ থাকে। আনকি বতৰ বিজ্ঞান কেন্দ্ৰই আগন্তুক এটা সপ্তাহ পৰ্যন্ত নিশা ১১ বজাৰ পৰা পুৱা ৫ বজালৈ ৰাজ্যৰ বিভিন্ন প্ৰান্তত ডাঠ বা ঘন কুঁৱলী পৰিব বুলি সতৰ্কতা জাৰি কৰাৰ পৰিপ্ৰেক্ষিতত সকলোৱে নিশা ৰাজপথত বাহন চলোৱাৰ ক্ষেত্ৰত আৰু “পথ সুৰক্ষা আৰু জীৱন ৰক্ষা”ৰ স্বাৰ্থত চালক সকলে অতি সাৱধানতা অৱলম্বন কৰিব লাগিব বুলি সদৰি কৰিছে।
