বিশ্বনাথৰ হাইদাবাৰীত চাওঁতাল ছাত্ৰ সন্থাৰ সাংগাঠনিক সভা সম্পন্ন
অসম খবৰ ,বিশ্বনাথৰ পৰা ৰমেশ চন্দ্ৰ চৰেণ , ২৮ নবেম্বৰ ঃ
বিশ্বনাথ জিলাৰ হাইদাবাৰী প্ৰেক্ষাগৃহত সদৌ চাওঁতাল ছাত্ৰ সন্থাৰ সাংগঠনিক সভাখন আজি গাম্ভীৰ্যপূৰ্ণ ভাবে অনুষ্ঠিত হৈ যায় ৷বিশ্বনাথ জিলা চাওঁতাল ছাত্ৰ সন্থাৰ সভাপতি ৰমেশ চন্দ্ৰ চৰেণ’ৰ সভাপতিত্বত অনুষ্ঠিত হোৱা সভাৰ আঁত ধৰে সাধাৰণ সম্পাদক চ’ম চৰেণে ৷
সভাত চাওঁতাল জনগোষ্ঠীৰ শৈক্ষিক , আৰ্থ সামাজিক ,ৰাজনৈতিক, তথা কলা কৃষ্টি সংস্কৃতিৰ ওপৰত বিশদভাৱে আলোচনা কৰাৰ উপৰিও চাওঁতাল অধ্যুষিত গাওঁসমুহৰ বিভিন্ন সমস্যা অভাৱ অভিযোগৰ ওপৰত আলোকপাত কৰা হয় ৷
বিশেষকৈ শৈক্ষিক সমস্যা তথা বাটপথ আৰু বিশুদ্ধ খোৱাপানীৰ সুব্যৱস্থাকৰনৰ বাবে সন্থাই বিশেষ পদক্ষেপ গ্ৰহন কৰাৰ সিদ্ধান্ত গ্ৰহন কৰে ৷তদুপৰি মেধাবী ছাত্ৰ ছাত্ৰীক পঢ়াৰ সুবিধা প্ৰদান কৰাৰো এক প্ৰস্তাৱ গ্ৰহন কৰা হয় ৷
সাংগঠনিক দিশতো আলোকপাত কৰা এইখন সভাতেই সদৌ চাওঁতাল ছাত্ৰ সন্থাৰ বিশ্বনাথ চাৰিআলি আঞ্চলিক সমিতিখন পুৰ্ণাংগ পৰ্যায়ৰ গঠন কৰা হয় ৷
সভাপতি হিচাবে ধীৰেন হাঁসদাক সৰ্বসন্মতি ক্ৰমে নিৰ্বাচন কৰাৰ বিপৰীতে সাধাৰণ সম্পাদকৰ পদত জিতেন হেমৰম নিৰ্বাচিত হোৱা ২১ জনীয়া পূৰ্ণাংগ পৰ্যায়ৰ বিশ্বনাথ চাৰিআলি আঞ্চলিক সমিতিখন গঠন কৰা হয় ৷
সভাত বিশ্বনাথ জিলা চাওঁতাল ছাত্ৰ সন্থাৰ প্ৰাক্তন সভাপতি সুভাষ বাস্কে , জিলা উপসভাপতি মাধৱ মাৰাণ্ডী মুখ্য সাংগঠনিক সম্পাদক ৰাজেন মুৰ্মু , প্ৰচাৰ সম্পাদক দেবেশ্বৰ হেম্বৰম , কৃষ্টি সম্পাদিকা জনিতা টুডুৰ লগতে বিশিষ্ট সমাজকৰ্মী ৰমেশ টুডু সহ আন কেইবাগৰাকী বিশিষ্ট ব্যক্তি উপস্থিত থাকে ৷শলাগৰ শৰাই আগবঢ়াই জিলা উপসভাপতি জনক চৰেণে ৷
সভাত জিলাখনৰ অন্তৰ্গত বিভিন্ন অঞ্চলৰ পৰা অহা ছাত্ৰ, ছাত্ৰী তথা যুৱক যুৱতী সকলে অংশ গ্ৰহন কৰে ৷
চলিত বৰ্ষৰ ডিচেম্বৰ মাহৰ ভিতৰতে জিলাখনৰ অন্তৰ্গত আন কেইবাখনো আঞ্চলিক সমিতি গঠন কৰা হব বুলি চাওঁতাল ছাত্ৰ সন্থাৰ নেতৃত্বই জানিব দিয়ে ৷
