বিশ্বনাথত কৃষকৰ মাজত ফচল বীমা পলিচি বিতৰণ
বিশ্বনাথ চাৰিআলি ৩ ছেপ্টেম্বৰঃ আজাদী কা অমৃত মহোৎসৱ ইণ্ডিয়া ৭৫’ অভিযানৰ অংশ হিচাপে ভাৰত চৰকাৰে প্রধানমন্ত্ৰী ফচল বীমা যোজনাৰ অধীনত ২০২২ বৰ্ষৰ খাৰিফ বতৰত “মেৰী পলিচি মেৰে হাথ” নামৰ এক কাৰ্যসূচী গ্ৰহণ কৰিছিল। এই কাৰ্যসূচীৰ জৰিয়তে ১ ছেপ্টেম্বৰ,২০২২ৰ পৰাই কৃষি বিভাগৰ তত্ত্বাৱধানত নিৰ্দিষ্ট বীমা কোম্পানীৰ প্ৰতিনিধিৰ জৰিয়তে আঁচনিত পঞ্জীয়নভুক্ত প্ৰতিজন কৃষকক পলিচি সম্পৰ্কীয় নথি-পত্ৰ দুৱাৰ দলিতে তুলি দিয়া হয় ৷
এই কাৰ্যসূচীৰে অংশ হিচাপে আজি বিশ্বনাথ জিলা কৃষি বিভাগৰ উদ্যোগত বিশ্বনাথ ৰাজ্যিক গ্ৰামীণ বিকাশ প্ৰতিষ্ঠানত “মেৰী পলিচি মেৰে হাথ” অভিযানৰ অংশ স্বৰূপে ফচল বীমা পলিচি বিতৰণ কৰা হয়। এগ্ৰিকালচাৰ ইন্সিওৰেঞ্চ কোম্পানী অৱ্ ইণ্ডিয়া লিমিটেডৰ সদস্যৰ উপস্থিতিত প্ৰায় শতাধিক কৃষকৰ মাজত প্ৰধানমন্ত্ৰী ফচল বীমা যোজনা (শালি ধান আৰু মাটিমাহ)ৰ পলিচি বিতৰণ কৰে বিশ্বনাথ সমষ্টিৰ বিধায়ক প্ৰমোদ বৰঠাকুৰ, বিশ্বনাথ জিলাৰ উপায়ুক্ত মুনীন্দ্ৰ নাথ ঙাটে, জিলা কৃষি বিষয়া দীপক বাঢ়ৈ আৰু মহকুমা কৃষি উন্নয়ন বিষয়া মনোজ কুমাৰ নাৰ্জাৰীয়ে।
সভাত উপস্থিত থাকি বিধায়ক প্ৰমোদ বৰঠাকুৰে বিশ্বনাথ জিলাৰ প্ৰতিগৰাকী কৃষকক প্ৰধানমন্ত্ৰী ফচল বীমা যোজনাৰ লাভ গ্ৰহণ কৰিবলৈ আহ্বান জনায়। লগতে ফচল বীমা যোজনাৰ পৰা কেনেদৰে কৃষকসকল উপকৃত হ’ব সেই সন্দৰ্ভতো সভাত বিস্তৃতভাৱে আলোচনা কৰা হয়। উক্ত সভাতেই উপায়ুক্ত মুনীন্দ্ৰ নাথ ঙাটে আৰু জিলা কৃষি বিষয়া দীপক বাঢ়ৈয়ে কৃষকসকলক বীমা পলিচি বিতৰণ কৰি তেওঁলোকৰ লগত মত বিনিময়ো কৰে।
