অসম কৃষি বিপণন পৰিষদৰ দায়িত্বহীনতাঃ কৃষ্ণাইৰ পণ্যাগাৰতে পচিল শ শ কুইণ্টল ধান

♦অসম কৃষি বিপণন পৰিষদৰ চূড়ান্ত দায়িত্বহীনতাৰ বাবে কৃষকৰ পৰা ক্ৰয় কৰা শ শ কুইণ্টল ধান কৃষ্ণাইৰ পণ্যাগাৰতে পচিছে৷ উল্লেখ্য যে গোৱালপাৰা জিলাৰ কৃষ্ণাই সাপ্তাহিক বজাৰত অৱস্থিত কৃষ্ণাই গ্ৰামীন পণ্যাগাৰত অসম কৃষি বিপণন পৰিষদে কৃষকৰ পৰা ক্ৰয় কৰা বহু হেজাৰ কুইণ্টল ধান মজুত কৰি ৰাখিছে৷ বিগত প্ৰায় চাৰি বছৰ ধৰি পণ্যাগাৰটোত ধান মজুত কৰি ৰখা হৈছে যদিও সময়ে সময়ে এই ধান খিনি তদাৰক নকৰাৰ ফলত শ শ কুইণ্টল ধান পচি গৈছে৷ আনকি অসুৰক্ষিত পণ্যাগাৰটোত ধান মজুত ৰখাৰ ফলত পণ্যাগাৰটোৰ ভিতৰতে ধানে গজালি মেলি কঠীয়াত পৰিণত হৈছে৷ জানিব পৰি মতে পণ্যাগাৰটোত প্ৰায় ২,৭০০ কুইণ্টল ধান মজুত আছিল৷ ইফালে সংৰক্ষিত ধান খিনি পচিবলৈ ধৰাৰ উমান পাই সোমবাৰে দুপৰীয়া অসম কৃষি বিপণন পৰিষদৰ বিষয়াবৰ্গই অতি গোপনে ২৫ জন মান শ্ৰমিক লগাই একেবাৰে গজালি ওলাই নষ্ট হোৱা ধানখিনি আঁতৰ কৰে৷ ইয়াৰ বিপৰীতে মজুত কৰি ৰখা প্ৰায় খিনি পচন আৰম্ভ হোৱা ধানকে পুণঃ নতুন বস্তাত ভৰাই থোৱাৰ দৰে ঘটনাও সংঘটিত হয় পণ্যাগাৰটোত! এই ক্ষেত্ৰত বিষয়টোৰ উচিত তদন্ত দাবী কৰিছে সচেতন মহলে৷