কৰ’নাৰ ভয়াৱহতাঃ বাতিল হ’ল ভেলাখামাৰ পূৱালী সংঘৰ ৰঙালী বিহু সন্মিলনী 

◊কৃষ্ণাইৰ পৰা কন্দৰ্প কুমাৰ দেৱ নাথঃ
মহামাৰী কৰ’নাৰ দ্ৰুত সংক্ৰমণৰ প্ৰতি লক্ষ্য ৰাখি বাতিল কৰা হ’ল গোৱালপাৰা জিলাৰ কৃষ্ণাইৰ কাষৰীয়া ভেলাখামাৰ পূৱালী সংঘৰ ৰঙালী বিহু সন্মিলনী৷ আজি সন্ধিয়া ৫ বজাত আয়োজিত এক সংবাদ মেলৰ জৰিয়তে ৰঙালী বিহু উদযাপন সমিতিয়ে তেওঁলোকৰ এই সিদ্ধান্তৰ কথা ঘোষণা কৰে৷ আজিৰ সংবাদ মেলত ৪২ সংখ্যক ৰঙালী বিহু উদযাপন সমিতিৰ কাৰ্যকৰী সভাপতি মাধৱ ৰাভাই কয় যে কৰ’না মহামাৰীয়ে দেশৰ লগতে ৰাজ্য খনত যি ভয়ংকৰ ৰূপ ধাৰণ কৰিছে তাৰ প্ৰতি লক্ষ্য ৰাখি এইবেলি পূৱালী সংঘৰ বিহু সন্মিলনীৰ সমগ্ৰ কাৰ্যসূচী বাতিল কৰা হ’ল৷ আনহাতে, সম্পাদক বিক্ৰম সিংহই কয় যে, ৰঙালী বিহু সন্মিলনী খনি উদযাপন কৰাৰ বাবে আমি এশ শতাংশই সাজু হৈছিলোঁ যদিও দেশৰ শেহতীয়া ভয়াবহ পৰিস্থিতিৰ প্ৰতি লক্ষ্য ৰাখি আমি সেয়া বাতিল কৰিবলৈ বাধ্য হৈছোঁ৷ আনহাতে, পূৱালী সংঘৰ সম্পাদক প্ৰশান্ত কুমাৰ দেৱ নাথে কভি’ড-১৯ৰ দ্বিতীয় লহৰৰ ভয়াবহ সংক্ৰমণে দেশ তথা আমাৰ ৰাজ্য খনত যি আতংকৰ সৃষ্টি কৰিছে তাৰ প্ৰতি লক্ষ্য ৰাখি এইবেলিৰ বিহু সন্মিলনী খন বাতিল কৰা বুলি জনায়৷ তেওঁ লগতে কভি’ড প্ৰট’কল মানি বিহু সন্মিলনীৰ দৰে অনুষ্ঠানবোৰ বাতিল কৰিবলৈ সমূহ অসমবাসী ৰাইজকে আহ্বান জনায়৷