শোণিতপুৰৰ বাঁহবাৰীত উদযাপন চতুৰ্দশ বাৰ্ষিক কৰম উৎসৱ

♦ ৰঙাপৰাঃ কৰম পূজা অসমৰ চাহ জনগোষ্ঠীসকলৰ মাজত এক সৰ্বজনীন, জনপ্ৰিয় আৰু তাৎপৰ্যপূৰ্ণ অনুষ্ঠান। হিন্দু বৰ্ষপঞ্জী অনুসৰি ভাদ মাহৰ একাদশীত উদযাপন কৰা এই কৰম উৎসৱে জনজাতীয় লোকসকলৰ পৰম্পৰাত এক বিশেষ গুৰুত্ব বহন কৰে। আজিৰ দিনটোত চাহ জনজাতীয় পুৰুষ আৰু মহিলাসকলে একেলগে কৰম দেৱতাৰ উপাসনা কৰে। মুখ্যতঃ ই এক কৃষিভিত্তিক পূজা হিচাপে জনাজাত। কৃষিকাৰ্যত যাতে প্ৰকৃতিৰ পৰা একো বাধা পোৱা নাযায় আৰু শস্যৰ উৎপাদন ভাল হয় তাৰ উদ্দেশ্যে পালন কৰা হয় এই পূজা। ৰাজ্যৰ অন্যান্য প্ৰান্তৰ সমান্তৰালকৈ শোণিতপুৰ জিলাৰ বাঁহবাৰীত আনন্দ উল্লাহেৰে পালন কৰম উৎসৱ৷

অসম চাহ জনজাতি ছাত্ৰ সন্থা(আটছা) বাঁহবাৰী উপ শাখাৰ সৌজন্যত আৰু স্থানীয় ৰাইজৰ সহযোগত অনুষ্ঠিত চতুৰ্দশ বাৰ্ষিক কৰম উৎসৱ ব্যাপক উৎসাহ উদ্দীপনাৰে পালন কৰা পৰিলক্ষিত হয়। যুৱক-যুৱতীসকলে ঝুমুৰৰ তালে-তালে হাতে-হাত ধৰি নৃত্য কৰাও পৰিলক্ষিত হৈছে। বাঁহবাৰীৰ অমিয় দাস উচ্চতৰ মাধ্যমিক বিদ্যালয়ৰ খেল পথাৰ প্ৰাংগনত অনুষ্ঠিত কৰম পূজাত সম্পূৰ্ণ ধৰ্মীয় নীতি-নিয়মেৰে কদম গছ ৰোপন কৰি বেদী স্থাপনেৰে ধূপ-দীপ-নৈবদ্যৰে পূজা অৰ্চনা কৰি সকলোৰে মংগল কামনা কৰে।

সম্পূৰ্ণ ৰীতি-নীতিৰে জাৱা জাগা ব্ৰতৰে তিনি দিন উপবাসে থাকি ব্ৰত পালন কৰা গাঁৱৰ কুমাৰী কন্যাসকলৰ দ্বাৰা কৰম ডাল আনি প্ৰতিষ্ঠা কৰাৰ পিছত পূজা-পাতল আৰম্ভ হয় আৰু পূজা ভাগত ধৰ্মা-কৰ্মাৰ কাহিনী সাৱলীলভাৱে ব্যাখ্যা দাঙি ধৰে কাহিনীকাৰ ললিত কৰ্মকাৰ আৰু সহযোগ কৰে পূৰ্নকান্ত কৰ্মকাৰে। আখড়া মুকলি আৰু ঝুমুৰ প্ৰতিযোগিতাৰ উদ্বোধন কৰে বৰঘোপ প্ৰাথমিক বিদ্যালয়ৰ অৱসৰ প্ৰাপ্ত প্ৰধান শিক্ষক লোহিত চন্দ্ৰ ৰাজৱাৰে।

কৰম উদযাপন সমিতিৰ কাৰ্যবাহী সভাপতি প্ৰাঞ্জল কুৰ্মি আৰু বাঁহবাৰী উপ শাখাৰ (আটছা)ৰ সম্পাদক শোভানন্দ ৰাজৱাৰে আত ধৰা মুকলি সভাত অংশগ্ৰহন কৰি হামৰো প্ৰজাশক্তি কাকতৰ মূখ্য পৰিচালন সঞ্চালক অঞ্জন উপাধ্যায় চাহ জনগোষ্ঠী আৰু নেপালী সম্প্ৰদায় দেশৰ ভিতৰতে আটাইতকৈ পিছপৰা। চৰকাৰে এই সম্প্ৰদায়ক ভূমিৰ অধিকাৰ দিব লাগে। ভূমিৰ অধিকাৰ সম্প্ৰদায় দুটাৰ মূখ্য দাবী বুলি তেওঁ উল্লেখ কৰে। সভাত অংশগ্ৰহন কৰি আটছাৰ কেন্দ্ৰীয় কাৰ্যনিৰ্বাহক সদস্য মোহন তাঁতীয়ে চাহ শ্ৰমিকসকলক মজুৰিসহ কৰম পূজা দিনটোত চৰকাৰী বন্ধ ঘোষণা কৰিবলৈ আহ্বান জনায়।

 

কালি সন্ধিয়া ৯ বজাৰ পৰা অনুষ্ঠিত মুকলি সভাত আদিবাসী উন্নয়ন পৰিষদৰ কাৰ্যনিৰ্বাহক সদস্য দ্বীপেন নায়ক, শোণিতপুৰ জিলা ভাৰতীয় জনতা পাৰ্টীৰ সভাপতি বাতাশ ওৰাং, চাৰিদুৱাৰ চাহ বাগিছাৰ জেষ্ঠ পৰিচালক পংকজ ভাটিয়া,অনিল কুৰ্মি, দৌলত ৰাজৱাৰ, সুনীল টুটি, প্ৰনৱ দত্ত, অজয় তাঁতী, বাঁহবাৰী উপ শাখাৰ সভাপতি সঞ্জীত ওৰাং, উদযাপন সমিতিৰ সভাপতি খগেন ৰাজৱাৰকে ধৰি বহু গন্য মান্য ব্যক্তি অংশগ্ৰহণ কৰে।