ৰাষ্ট্ৰীয় প্ৰেছ দিৱস উপলক্ষে অসম চৰকাৰৰ তথ্য আৰু জনসংযোগ বিভাগে আজি গুৱাহাটীত ৰাজ্যিক ভিত্তিত ১২ জনকৈ প্ৰবীণ সাংবাদিকক সম্বৰ্ধনা জ্ঞাপন কৰে।
গুৱাহাটীৰ লাষ্টগেটস্থিত পি ডব্লিউ ডি কনভেনচন চেণ্টাৰত দিনৰ ১১ বজাৰ পৰা অনুষ্ঠিত হোৱা ৰাষ্ট্ৰীয় প্ৰেছ দিৱসত আজি মূখ্য অতিথি হিচাপে অসম চৰকাৰৰ জলসম্পদ, তথ্য আৰু জনসংযোগ বিভাগৰ মন্ত্ৰী পীয়ুষ হাজৰিকা উপস্থিত থাকে। অসম চৰকাৰৰ মন্ত্ৰী পীয়ুষ হাজৰিকা উপস্থিত থকা গাম্ভীৰ্যপূৰ্ণ অনুষ্ঠানটোত ৰাজ্যৰ অবিৰত, নিষ্ঠাপূৰ্ণ সংবাদ সেৱা আগবঢ়ায় অহা ১২ জনকৈ বিশিষ্ট সাংবাদিকক সম্বৰ্ধনা জনায়।
ৰাষ্ট্ৰীয় প্ৰেছ দিৱসৰ এই অনুষ্ঠানত অসম চৰকাৰৰ পৰা সম্বৰ্ধনা গ্ৰহণ কৰে মৰিগাঁৱৰ দুজনকৈ প্ৰবীণ সাংবাদিক দ্যা আছাম ট্ৰিবিউনৰ জ্যেষ্ঠ সাংবাদিক ডালিম ফুকন আৰু অসমীয়া খবৰ,দৈনিক অগ্ৰদূতৰ জ্যেষ্ঠ সাংবাদিক অজিত শৰ্মাই। উল্লেখ্য যে- অসমৰ সংবাদ জগতত নিষ্ঠাৰে সুদীৰ্ঘ ৩২ বছৰতকৈও অধিক কাল ধৰি সাংবাদিকতাৰ ক্ষেত্ৰখনত সেৱা আগবঢ়ায় অহা “দ্যা আছাম ট্ৰিবিউন”ৰ জ্যেষ্ঠ সাংবাদিক ডালিম ফুকন আৰু “অসমীয়া খবৰ”,”দৈনিক অগ্ৰদূত”ৰ জ্যেষ্ঠ সাংবাদিক অজিত শৰ্মাক আজি গুৱাহাটীত ৰাজ্যিক ভিত্তিত আয়োজন কৰা ৰাষ্ট্ৰীয় প্ৰেছ দিৱসত অসম চৰকাৰে সম্বৰ্ধনা জনোৱাত মৰিগাঁৱৰ বহু অনুষ্ঠান প্ৰতিষ্ঠানে উষ্ম আদৰণি জনায়।
আজি গুৱাহাটীৰ পি ডব্লিউ ডি কনভেনচন চেণ্টাৰত অনুষ্ঠিত হোৱা ৰাষ্ট্ৰীয় প্ৰেছ দিৱসৰ গাম্ভীৰ্যপূৰ্ণ অনুষ্ঠানটোত সন্মানীয় অতিথি হিচাপে উপস্থিত থাকে অসম চৰকাৰৰ অতিৰিক্ত সচিব পৱন কুমাৰ বৰঠাকুৰ, মুল বক্তা হিচাপে তেজপুৰ বিশ্ববিদ্যালয়ৰ সমাজতত্ব বিভাগৰ অধ্যাপক ড০ চন্দন কুমাৰ শৰ্মাই অংশ গ্ৰহণ কৰে।
