“পুৰুষ সমাজে নাৰী জাতিক অপমান কৰা নাই আৰু আগলৈকো নকৰে “-মৃণালীনী দেৱী
■ ছাদিকুজ জামান মোৰাঝাৰ: “নাৰী সকল অনন্ত অসীম, নাৰী জাতি মানৱ সমাজক গতিশীল কৰি তুলিছে । পুৰুষ সমাজে আগতেও নাৰী জাতিক অপমান কৰা নাছিল আৰু আগলৈকো নকৰে বুলি মোৰ বিশ্বাস”-এই মন্তব্য অসম সাহিত্য সভাৰ উপ সভাপতি মৃণালীনী দেৱীৰ।
আজি হোজাইৰ কাকীত অনুষ্ঠিত হোজাই জিলা সাহিত্য সভাৰ দ্বিতীয় দ্বী বাৰ্ষিক বিশেষ অধিৱেশনৰ মুকলি সভাত যোগদান কৰি ভাষণ প্ৰসংগত এনেদৰে কয়। হোজাই জিলা সাহিত্য সভাৰ বিশেষ বাৰ্ষিক কাকী অধিৱেশনৰ আজি সামৰণি পৰে।
কালিৰে পৰা এক উখল মাখল পৰিৱেশৰ মাজেৰে শুভাৰম্ভ হোৱা অধিৱেশনৰ প্ৰথম দিনাৰ কাৰ্যসূচী অনুসৰি পূৱা প্ৰতিনিধি পঞ্জীয়ন, ৰামধেনুৰ কল্পতৰু শীৰ্ষক এক নিৰ্বাচিত কবি,শিল্পী সকলৰ অনুষ্ঠান,১০ বজাত মুকুন্দ বড়ো সোঁৱৰণী গ্ৰন্থমেলাৰ দুৱাৰ মুকলি কৰে সাহিত্যিক তথা জিলা সমিতিৰ প্ৰতিষ্ঠাপক সভাপতি ডঃসাৰদান্দ দেৱ গোশ্বামীয়ে৷ দিনৰ ১১ বজাত কাকী কনিষ্ঠ মহাবিদ্যালয়ত শিৱপ্ৰসাদ বৰা সোঁৱৰণী সভাকক্ষত প্ৰতিনিধি সভা অনুষ্ঠিত হয়৷
সভাত কেইবাটাও প্ৰস্তাৱ গ্ৰহন কৰা হয়৷ ইয়াৰ লগতে আকাশ উপসমিতিৰ সৌজন্যত “ৰীতা বৰা সোঁৱৰণী বিয়ানাম” আৰু “পুষ্পলতা দত্ত সোঁৱৰণী আইনাম” প্ৰতিযোগিতাৰ আয়োজন কৰা হয়। জিলা ভিত্তিত প্ৰতিযোগিতা সমূহত বিভিন্ন শাখাৰ পৰা যোগদান কৰে।
যিহেতু ২০২১ বৰ্ষটো জিলা সভাই গ্ৰন্থ বৰ্ষৰূপে পালন কৰিবলৈ লৈছে সেইহেতুকে সকলোৱে উপহাৰ স্বৰূপে যেন কেৱল গ্ৰন্থকে দিয়ে তাৰবাবেও আহ্বান জনায় জিলা সম্পাদক অনুপ কুমাৰ বৰঠাকুৰে।
এই আহব্বানৰ সহাঁৰি জনাই গ্ৰন্থমেলাত ছাত্ৰ- ছাত্ৰী,সাহিত্যনুৰাগীৰ ভিৰ হোৱা দেখা যায়।গ্ৰন্থ মেলাথলীত অস্থায়ী মঞ্চত শিশু আৰু কিশোৰ কিশোৰীৰ মাজত বিভিন্ন অনুষ্ঠানৰ আয়োজন কৰা হয়।
আজিৰ দ্বিতীয় দিনাৰ কাৰ্যসূচীত পুৱা অসম সাহিত্য সভাৰ পতাকা উওোলন কৰে হোজাই জিলা সাহিত্য সভাৰ সভাপতি ড’ গুণেশ্বৰ শইকীয়াই৷ স্মৃতি তৰ্পণ কৰে লক্ষীপ্ৰসাদ বৰাই আৰু শ্বহীদ তৰ্পণ কৰে বিভা ফুকনে৷
গ্ৰন্থমেলাৰ বাকৰিৰ অস্থায়ী মঞ্চত কবি সন্মিলনৰ নিৰ্বাচিত অনুষ্ঠান হোৱাৰ লগতে সাংস্কৃতিক শোভাযাত্ৰা উদ্বোধন কৰে গজেন হাজৰিকাই৷
দুপৰীয়া জিলা সাহিত্য সভাৰ সভাপতি ডঃ গুণেশ্বৰ শইকীয়াৰ সভাপতিত্বত গ্ৰন্থ উন্মোচনী আৰু মুকলি সভা অনুষ্ঠিত হয়৷ জিলা সম্পাদক অনুপ কুমাৰ বৰঠাকুৰে পৰিচালনা কৰা মুকলি সভাৰ উদ্বোধন কৰে অসম সাহিত্য সভাৰ প্ৰধান সম্পাদক যাদৱ চন্দ্ৰ শৰ্মাই।
সভাত ৰবীন্দ্ৰনাথ ঠাকুৰ বিশ্ববিদ্যালয়ৰ উপাচাৰ্য ডঃঅমলেন্দু চক্ৰৱৰ্তী উপস্থিত থাকি ভাষণ প্ৰদান কৰে ।সভাত মুখ্য অতিথি হিচাপে অসম সাহিত্য সভাৰ প্ৰাক্তন ভাৰপ্ৰাপ্ত সভাপতি প্ৰহ্লাদ চন্দ্ৰ তাচা,সন্মানীয় অতিথি হিচাপে সভাৰ উপ সভাপতি মৃণালিনী দেৱীয়ে স্বামী বিবেকানন্দই নাৰী সন্দৰ্ভত তত্বগধূৰ ভাষণ প্ৰদান কৰে।
সভাৰ শিক্ষা সংসদৰ ৰানা বশিষ্ট্য আৰু নিদিষ্ট বক্তা আৰু গ্ৰন্থ উন্মোচক হিচাপে থাণেশ্বৰ মালাকৰৰ লগতে অসম সাহিত্য সভাৰ নগাঁও আঞ্চলিক কাৰ্য্যালয়ৰ সম্পাদক মৃণাল হাজৰিকা, নগাঁও জিলা সাহিত্য সভাৰ সভাপতি পৰাণ কুমাৰ বৰুৱা, মৰিগাঁও জিলা সাহিত্য সভাৰ সভাপতি প্ৰতাপ হাজৰিকা, সুৰমা উপত্যকাৰ সভাৰ সাংগঠনিক সম্পাদক অৰিজিত দাসগুপ্ত, সভাৰ আকাশ উপ সমিতিৰ আহ্বায়িকা স্বপ্না কলিতা,ডিমা হাছাও সাহিত্য সভাৰ প্ৰাক্তন উপ সভাপতি নৃপেন ভূঞা, অসম মণিপুৰী সাহিত্য পৰিষদৰ হোজাই জিলাৰ সভাপতি টি মনিহাৰ সিংহ, হোজাই জিলা সাহিত্য সভাৰ সভাপতি ভোলানাথ থাউছেন, নেপালী সাহিত্য সভাৰ হোজাই জিলাৰ সভাপতি গঙ্গাসাগৰ উপাধ্যায়, হোজাই জিলা সাহিত্য সভাৰ প্ৰতিস্থাপক সভাপতি ডঃ সাৰদানন্দ দেৱ গোস্বামী আদিকে ধৰি সভাত ভালেমান আমন্ত্ৰণিত অতিথি উপস্থিত থাকে।
সভাত ইতিহাসবিদ সমাজসেৱক তথা অসম চৰকাৰে ঐতিহ্য মিত্ৰ নামেৰে বিশেষ ভাবে সন্মান প্ৰদান কৰা কৃষ্ণ কুমাৰ সিংহৰ এখন অভিনন্দন গ্ৰন্থ উন্মোচন কৰাৰ লগতে দেৱৰাজ মিলি সম্পাদিত জিলা সাহিত্য সভাৰ পত্ৰিকাৰ লগতে দ্বিতীয় বাৰ্ষিক অধিৱেশন উপলক্ষে প্ৰকাশিত প্ৰদীপ কুমাৰ বৰা সম্পাদিত কৌস্তুৰী নামৰ স্মৃতিগ্ৰন্থ, আকাশ উপ সমিতিৰ বাৰ্ষিক পত্ৰিকা ৰেখা লস্কৰ বৰাৰ সম্পাদনাত ‘আকাশ’ৰ লগতে কেইবাখনো গ্ৰন্থ উন্মোচন কৰা হয়।
সভাত আকাশ উপ সমিতিৰ আইনাম আৰু বিয়ানামৰ প্ৰতিযোগী সকলক বঁটা প্ৰদান কৰে উপ সভাপতি গৰাকীয়ে। এই অধিবেশনৰ দুয়ো দিনে সন্ধ্যা সাংস্কৃতিক অনুষ্ঠানৰ আয়োজন কৰা হয় ।
