বিশ্বনাথ ১২ আগষ্ট :
আজি ১২ আগষ্ট বিশ্ব হস্তী দিৱস। ভাৰতৰ আটাইতকৈ বয়স্ক জীৱিত হাতীটো বৰ্তমান বিহালী সমষ্টিত।
উল্লেখযোগ্য যে বৃটিছ উপনিবেশৰ সাক্ষ্য বহনকাৰী ভাৰতৰ আটাইতকৈ বয়স্ক জীৱিত হস্তীটো নাম হৈছে বিজুলী প্ৰসাদক ।
পূৰ্বে বিজুলিক বিশ্বনাথ জিলাৰ বিহালী সমষ্টিৰ বৰগাঁও চাহ বাগিছাত ৰখা হৈছিল যদিও সম্প্ৰতি জিলাখনৰে বিহালী চাহ বাগিছাৰ বাসিন্দা বিজুলী প্ৰসাদ ।
আজিও সাত সাগৰ তেৰ নদীৰ সিপাৰৰ পৰা বিজুলীৰ খবৰ ৰাখে ইংৰাজ চাহাবে ।
প্ৰায় ৮৬ বছৰ পূৰ্বে উইলিয়ামছন মেগৰ টি কোম্পানীয়ে ক্ৰয় কৰিছিল হাতীটো । বৃটিছৰ অলিভাৰ চাহাবে হাতীটোক নাম দিছিল বিজুলী প্ৰসাদ ।
মেগৰ কোম্পানীৰ পৰিয়ালৰ সদস্য হৈ পৰা বিজুলী এসময়ত হৈ পৰিছিল কোম্পানীটোৰ আভিজাত্যৰ প্ৰতীক । বিজুলিৰ খাদ্য তালিকাত আছে প্ৰতিদিনে ২৫ কেজি চাউল, সম পৰিমানৰ গোমধান, বুটমাহ আৰু সপ্তাহত কেইবাগাড়ীও কলগছ যোগান বিজুলী প্ৰসাদক যোগান ধৰি অহা হৈছে বুলি জানিব দিয়ে চাহ বাগিচাৰ কৰ্তৃপক্ষই।
বিজুলী প্ৰসাদক পৰিচৰ্যাৰ বাবে বৃটিছৰ অলিভাৰ চাহাবে নিয়োগ কৰিছিল কেইবাজনো কৰ্মচাৰী । বৰ্তমান টমাছ মুণ্ডা আৰু নৰেশ সৰকাৰে চোৱা চিতা কৰি আছে বিজুলিক ৷ প্ৰতি সপ্তাহতে বিজুলী প্ৰসাদৰ শৰীৰৰ ওজন পৰীক্ষা কৰাৰ লগতে নিয়মিত বিজুলীৰ স্বাস্থ্য পৰীক্ষা কৰি পঠোৱা হয় বাগিচা খনৰ মুখ্য কাৰ্যালয় কলিকতালৈ।
বৰ্তমান পুৱাই দিয়া হয় ২৫ কেজি খাদ্য ৷ বিজুলীৰ খাদ্যৰ তালিকাত আছে চাউল, গোমধান আৰু বুটমাহৰ লগতে দৈনিক যোগান ধৰা হয় কলগছ ৷ বিজুলিক পৰিচৰ্যা কৰোতে বছৰি ৬ লাখ টকা খৰচ হয় আৰু চাহ কোম্পানীয়ে খৰচ কৰে সমুদায় ধন ৷
পশু চিকিৎসক ড° কে কে শৰ্মাৰ তত্বাৱধানত হাতীটোক এতিয়াও নিয়মিত স্বাস্থ্য পৰীক্ষা আৰু ওজন আদি কৰোৱা হয় ৷
ইপিনে, আজিও যদি বিজুলী প্ৰসাদৰ স্বাস্থ্যৰ খবৰ চাহ কোম্পানীৰ কলিকতাস্থিত মূখ্যকাৰ্যালয়ত পোৱাত বিলম্ব হয় মুখ্য কাৰ্যালয়ৰ ভিতৰ চ’ৰাত লাগে খদম দম ।
এতিয়া এনেদৰেই সম্পূৰ্ণ ৰাজ আতিথ্যত দিন অতিবাহিত কৰিছে বৃটিছ আভিজাত্যৰ প্ৰতীক বিজুলী প্ৰসাদে । আজি বিশ্ব হস্তী দিৱস উপলক্ষে বিহালী চাহ বাগিছাৰ ৰঙাগড়া ডিভিজনত অনুষ্টুপীয়াকৈ আয়োজন কৰ হয় এক বিশেষ অনুষ্ঠান ৷ বিজুলিক গা ধুৱাই সজাই পৰাই পালন কৰা হয় হস্তী দিৱস ৷
কৰ্ণাটকৰ বয়স্ক হাতী চামুণ্ডা প্ৰসাদৰ ৮২ বছৰ বয়সত মৃত্যু হোৱাৰ পিছত এতিয়া বিজুলী প্ৰসাদেই দেশৰ বৰ্ষীয়ান হাতী হিচাপে স্বীকৃতি লাভ কৰিলে ৷
