● চামগুৰিত নুৰুল আমিন চৌধুৰী, বিহালীত অনন্ত গগৈৰ মাৰাথন প্ৰচাৰ
গুৱাহাটী● চামগুৰিৰ আপৰ মনোনীত প্ৰাৰ্থী ডঃ নুৰুল আমিন চৌধুৰীৰ সমৰ্থনত সমষ্টিটোৰ ভূৰবন্ধা গাওঁ পঞ্চায়তৰ শান্তি বজাৰ এলেকাত আজি নিৰ্বাচনী সভা অনুষ্ঠিত হয়। নিৰ্বাচনী সভাত আপৰ প্ৰাৰ্থী নুৰুল আমিন চৌধুৰীৰ উপৰি দলৰ ৰাজ্যিক উপ সভাপতি সৌমিক সেনগুপ্ত, জ্যেষ্ঠ নেতা অম্লানজ্যোতি হাতীবৰুৱা আৰু সঞ্জিত বৰ্মন উপস্থিত থাকে।
সভাত উপস্থিত বক্তা সকলে চামগুৰি সমষ্টিৰ যোগাযোগ ব্যৱস্থা, শৈক্ষিক বিকাশ আৰু স্বাস্থ্য খণ্ডৰ উন্নয়নৰ বাবে আপৰ প্ৰাৰ্থীক ভোট দিবলৈ আহ্বান জনায়। সমষ্টিটোৰ ৬ নং আৰু ৭ নং ভগামুখত অনুষ্ঠিত নিৰ্বাচনী সভাত বহুসংখ্যক ৰাইজে যোগদান কৰে। সভাত বক্তা সকলে দিল্লী আৰু পঞ্জাৱ চৰকাৰৰ আৰ্হিত অসমতো কামৰ ৰাজনীতি আৰম্ভ কৰাৰ স্বাৰ্থত আপৰ প্ৰাৰ্থীক সমৰ্থন কৰিবলৈ আহ্বান জনায়।
আনহাতে, বিহালীতো আজি আম আদমী পাৰ্টিৰ কেইবাখনো প্ৰচাৰ সভা অনুষ্ঠিত হয়। সভাত আপৰ প্ৰাৰ্থী অনন্ত গগৈৰ লগতে ৰাজ্যিক সাধাৰণ সম্পাদক ৰাজীৱ শইকীয়া, প্ৰশাসনিক সম্পাদক ভিক্টৰ গগৈ আৰু অন্যান্য নেতৃবৃন্দই অংশগ্ৰহণ কৰে। বিহালী তিনিখুটি গাওঁ পঞ্চায়তত অনুষ্ঠিত হয় অনন্ত গগৈৰ নিৰ্বাচনী প্ৰচাৰ সভা।
আপৰ ৰাজ্যিক সাধাৰণ সম্পাদক ৰাজীৱ শইকীয়াই বিহালী বাসীৰ প্ৰতি বিজেপি আৰু কংগ্ৰেছে কৰি অহা দীৰ্ঘদিনীয়া বঞ্চনাৰ অৱসানৰ হকে দলৰ প্ৰাৰ্থী অনন্ত গগৈক ভোট দিবলৈ আহ্বান জনায়।
