অনলাইনত সামগ্ৰী কিনোতে সাৱধান হওঁকঃ দিল্লীত এমাজন চেল প্রাইভেট লিমিটেডৰ গুডামত অভিযান

খাদ্যৰ মান নির্ণয়কাৰী ৰাষ্ট্ৰীয় সংস্থা, ভাৰতীয় মান্যক ব্যুৰ’ৱে দিল্লীস্থিত এমাজন চেল প্রাইভেট লিমিটেডৰ গুডামত আজি অভিযান চলায়। গ্রাহক পৰিক্ৰমা, খাদ্য আৰু ৰাজহুৱা বিতৰণ মন্ত্র্যালয়ে প্রকাশ কৰা অনুসৰি মান্যক ব্যুৰ’ৱে এমাজনৰ গুডামত প্রায় ১৫ ঘণ্টা ধৰি অভিযান চলাই ৩,৫০০ ৰো অধিক সামগ্রী জব্দ কৰে। জব্দ কৰা সামগ্ৰীসমূহৰ ভিতৰত আই এছ আই চিহ্ন নথকা আৰু ভুৱা আই এছ আই চিহ্ন সম্বলিত সামগ্রী আছে। জব্দ কৰা সামগ্ৰীখিনিৰ মূল্য প্রায় ৭০ লাখ টকা বুলি মন্ত্ৰ্যালয়ে প্রকাশ কৰিছে। মান্যক ব্যুৰ’ৱে দিল্লীৰ ফ্লিপকাৰ্টৰ এটা সহায়ক কোম্পানী ইনষ্টাকার্ট ছার্ভিচেজ প্রাইভেট লিমিটেডতো পৃথক অভিযান চলাই আই এছ আই মার্ক নথকা খেলৰ বাবে পৰিধান কৰা প্ৰায় ৬ লাখ টকা মূল্যৰ ৫৯০ যোৰ জোতা জব্দ কৰে।