জালুকবাৰী জাতীয় বিদ্যালয়ৰ ৰূপালী জয়ন্তী উদযাপনৰ আয়োজন

জ

গুৱাহাটীৰ গাড়ীগাঁওস্থিত জালুকবাৰী জাতীয় বিদ্যালয়ৰ ২৫ বছৰ পূৰ্ণ হোৱা উপলক্ষে অহা ৪ আৰু ৫ জানুৱাৰীত দুদিনীয়া কাৰ্যসূচীৰে ৰূপালী জয়ন্তী উৎসৱ উদযাপনৰ আয়োজন কৰা হৈছে। কাৰ্যসূচী অনুসৰি ৪ জানুৱাৰীত পুৱা ৮.৩০ বজাত মুখ্য তোৰণ মুকলিৰে ৰূপালী জয়ন্তী উৎসৱৰ শুভাৰম্ভ কৰিব পাটাচছাৰকুছি বিদ্যাপীঠৰ অৱসৰপ্ৰাপ্ত অধ্যক্ষ খনিন্দ্ৰ নাথ তালুকদাৰে। ৰূপালী জয়ন্তী উৎসৱৰ লগত সংগতি ৰাখি ৯.৩০ বজাত অনুষ্ঠিত হবলগীয়া বাৰেৰহনীয়া সাংস্কৃতিক শোভাযাত্ৰা মুকলি কৰিব অসম বন বিদ্যালয়ৰ সঞ্চালক ডিম্পী বৰাই। বিয়লি ২ বজাৰ পৰা বিদ্যালয়ৰ প্ৰাক্তন ছাত্ৰ – ছাত্ৰীৰ সমাৰোহ আৰু বৰ্ণাঢ্য সাংস্কৃতিক অনুষ্ঠান অনুষ্ঠিত হব। ৫ জানুৱাৰীত পুৱা ১০ বজাত মুকলি সভা অনুষ্ঠিত হব। সভাত মুখ্য অতিথি হিচাপে মুখ্যমন্ত্ৰী ডঃ হিমন্ত বিশ্ব শৰ্মা উপস্থিত থাকিব। বিয়লি ৪ বজাৰ পৰা বাৰেৰহনীয়া সাংস্কৃতিক অনুষ্ঠান অনুষ্ঠিত হব। আনহাতে ৰূপালী জয়ন্তী উৎসৱৰ কাৰ্যসূচী সুচাৰুৰূপে পৰিচালনা কৰিবলৈ কমল কলিতাক সভাপতি, ডাঃ ভবেশ দাসক কাৰ্যকৰী সভাপতি, অৰবিন্দ আৰন্ধৰাক মূখ্য সম্পাদক, দেবেন দাস আৰু অৰূপ তালুকদাৰক সাধাৰণ সম্পাদক হিচাপে লৈ এখন উদযাপন সমিতি গঠন কৰা হৈছে। সমিতিয়ে ৰূপালী জয়ন্তী উৎসৱৰ কাৰ্যসূচীত বিদ্যালয়ৰ প্ৰাক্তন ছাত্ৰ-ছাত্ৰী আৰু শিক্ষক-শিক্ষয়িত্ৰী, শুভাকাংক্ষী সকলোৰে উপস্থিতি আন্তৰিকতাৰে কামনা কৰিছে।