গোৱালপাৰাত ৬ এপ্ৰিলত ৪৮ ঘন্টাৰ বাবে মাদক দ্ৰব্য প্ৰচলন নিষিদ্ধ ঘোষণা

কন্দৰ্প কুমাৰ দেৱ নাথ, কৃষ্ণাইঃ অসম বিধান সভা নিৰ্বাচন ২০২১ৰ তৃতীয় পৰ্যায়ত অৰ্থাৎ ৬ এপ্ৰিলত গোৱালপাৰা জিলাত হ’বলগীয়া ভোট গ্ৰহণৰ প্ৰতি লক্ষ্য ৰাখি গোৱালপাৰা জিলা দণ্ডাধীশ বৰ্ণালী ডেকাই অহা ৪ এপ্ৰিলৰ সন্ধিয়া ৬ বজাৰ পৰা ৬ এপ্ৰিলৰ সন্ধিয়া ৬ বজালৈ ৪৮ ঘন্টাৰ বাবে জিলাখনত মাদক দ্ৰব্যৰ প্ৰচলন সম্পূৰ্ণ ভাৱে বন্ধ ঘোষণা কৰিছে৷

অসম চৰকাৰৰ ১০ মাৰ্চ ২০২১ ৰ EX.265/97/Pt./504 নং নিৰ্দেশ অনুসৰি গোৱালপাৰাৰ জিলা দণ্ডাধীশে এই নিষেধাজ্ঞা জাৰি কৰিছে৷ উক্ত সময় চোৱাত কোনো ব্যক্তি বা ব্যক্তি সমূহে ব্যক্তিগত বা ৰাজহুৱা স্থানত দেশীয় সুৰা, দেশত নিৰ্মিত বিদেশী সুৰা আদিৰ মজুতকৰণ, বিক্ৰী , দান অথবা বিতৰণ কৰিব নোৱাৰিব৷ ভোট গণনাৰ বাবে নিৰ্দিষ্ট কৰা দিনটোত অৰ্থাৎ ২ মে’ৰ দিনাখনো ভোট গণনা সমাপ্ত নোহোৱালৈকে এই নিষেধাজ্ঞা বাহাল থাকিব৷ গোৱালপাৰা জিলা দণ্ডাধীশৰ এই নিৰ্দেশনা ভংগ অথবা আওকাণ কৰিলে অসম আবকাৰী আইন আৰু বিধি অনুসৰি শাস্তিযোগ্য অপৰাধত দোষী সাব্যস্ত কৰা হ’ব৷